პორტუგალიის პრემიერ-მინისტრი კორუფციული სკანდალის გამო გადადგა. როგორც „პოლიტიკო“ წერს, ანტონიუ კოშტამ განცხადება მას შემდეგ დაწერა, რაც მის ოფიციალურ რეზიდენციაში პოლიცია მივიდა, ხოლო, პორტუგალიის გენერალურმა პროკურატურამ დაადასტურა, რომ ის კორუფციულ გარიგებებშია ეჭვმიტანილი.

სატელევიზიო მიმართვისას პორტუგალიის პრემიერ-მინისტრმა განაცხადა, რომ მისთვის მოულოდნელი იყო ინფორმაცია იმის შესახებ, რომ მის წინააღმდეგ სისხლის სამართლის საქმეა აღძრული. კოშტას თქმით, უკანონო ქმედებებთან მას არანაირი კავშირი არ აქვს. მიუხედავად ამისა, პორტუგალიის პრემიერ-მინისტრი მიიჩნევს, რომ კორუფციის ბრალდება და მის წინააღმდეგ მიმდინარე გამოძიება არ აძლევს მას უფლებას, მთავრობის მეთაურის თანამდებობაზე დარჩეს.

კოშტას გადადგომის შემდეგ პორტუგალიის პრეზიდენტი ან ვადამდელ არჩევნებს დანიშნავს, ან მთავრობის მეთაურის პოსტზე მმართველი პარტიიდან სხვა კანდიდატს წარადგენს.

გავრცელებული ინფორმაციით, პრემიერ-მინისტრის წინააღმდეგ გამოძიება ლითიუმის საბადოსა და მწვანე წყალბადის მეგაპროექტს უკავშირდება, კერძოდ, პორტუგალიის პრემიერ-მინისტრი და მთავრობა მხარს უჭერდა ქვეყნის სხვადასხვა ნაწილში ლითიუმის მოპოვებას, მიუხედავად იმისა, რომ სპეციალისტები მიუთითებდნენ, რომ ლითიუმი უხარისხოა და მისი მოპოვება გარემოს საფრთხეს შეუქმნიდა.

გამოძიების ფარგლებში დაკავებულია პორტუგალიის მთავრობის მეთაურის ადმინისტრაციის უფროსი. ბრალი ასევე წარუდგინეს პორტუგალიის ინფრასტრუქტურის მინისტრს და გარემოს დაცვის სააგენტოს უფროსს.