პრაღაში ერდოღანისა და ფაშინიანის პირისპირ შეხვედრა გაიმართა
თურქეთისა და სომხეთის ლიდერებმა ხუთშაბათს პირველი პირისპირი შეხვედრა გამართეს მას შემდეგ, რაც ორი ქვეყანა ურთიერთობის გაუმჯობესებაზე შეთანხმდა.
თურქეთის პრეზიდენტი, რეჯეფ თაიფ ერდოღანი და სომხეთის პრემიერ-მინისტრი, ნიკოლ ფაშინიანი ერთმანეთს პრაღაში, 44 ქვეყნის ლიდერის სამიტის ფარგლებში შეხვდნენ.
სამი ლიდერის არაფორმალურ შეკრებაზე აზერბაიჯანის პრეზიდენტი, ილჰამ ალიევიც იმყოფებოდა. დეტალები იმის შესახებ, თუ რაზე ისაუბრეს ლიდერებმა მაშინვე არ გავრცელებულა.
მოგვიანებით, ერდოღანმა და ფაშინიანმა თავიანთი ქვეყნების დელეგაციებს შორის ორმხრივი მოლაპარაკებები გამართეს.
როგორც ცნობილი გახდა, ნიკოლ ფაშინიანმა და რეჯეფ თაიფ ერდოღანმა სომხეთ-თურქეთის ურთიერთობების ნორმალიზების პროცესი და ამ მიმართულებით შესაძლო ნაბიჯები განიხილეს.
მხარეებმა ხაზი გაუსვეს დისკუსიის შედეგად მიღწეული შეთანხმებების სწრაფი განხორციელების აუცილებლობას.
კერძოდ, საუბარია მესამე ქვეყნების მოქალაქეებისთვის სახმელეთო საზღვრის გახსნასა და სომხეთსა და თურქეთს შორის საჰაერო ტვირთების გადაზიდვაზე.
