რუსეთის პრეზიდენტი ვლადიმერ პუტინი ჩინეთში პრეზიდენტ სი ძინპინის მიწვევით ჩავიდა. რუსეთის ლიდერი პეკინში ორი დღე - 17 და 18 ოქტომბერს დარჩება.

ვიზიტის პირველ დღეს პუტინი კოლეგებთან ორმხრივ შეხვედრებს გამართავს, რომლებიც ასევე მონაწილეობენ მესამე საერთაშორისო ფორუმში "ერთი სარტყელი - ერთი გზა". დაგეგმილია მოლაპარაკებები ვიეტნამის პრეზიდენტ ვო ვან თჰიონგთან, ტაილანდის პრემიერ-მინისტრთან სრეტა ტავისინთან, მონღოლეთის პრეზიდენტ უხნააგიინ ხურელსუხთან და ლაოსის სახალხო დემოკრატიული რესპუბლიკის პრეზიდენტთან თონგლუნ სისულითისთან. სამშაბათს რუსეთის პრეზიდენტი ასევე მიიღებს მონაწილეობას ოფიციალური შეხვედრის ცერემონიაში ჩინეთის პრეზიდენტ სი ძინპინთან და მის მეუღლე პენ ლიუანთან.

ფორუმის მთავარი ღონისძიებები 18 ოქტომბერს ტიანანმენის მოედანზე მდებარე სახალხო კრებათა დიდ დარბაზში გაიმართება. ასევე ოთხშაბათს გაიმართება რუსულ-ჩინური მოლაპარაკებები, რის შემდეგაც პუტინი ფორუმის ფარგლებში ორმხრივ შეხვედრებს გააგრძელებს.