რუსეთის პრეზიდენტი ვლადიმერ პუტინი ანტირუსული სანქციების გამკაცრებას ელის. ამის შესახებ რუსეთის სახელმწიფოს მეთაურმა ეკონომიკურ საკითხებზე გამართულ შეხვედრაზე ისაუბრა.

„ჩვენ მზად უნდა ვიყოთ იმისთვის, რომ დასავლეთის სანქციების ზეწოლა გაძლიერდება. გასულ წლებში ჩვენმა ე.წ. პარტნიორებმა უკვე მიიღეს სანქციების უთვალავი პაკეტი ჩვენს წინააღმდეგ, თუმცა, თავადვე გაიხლართნენ, ისინი ჩვენს დასჯას ცდილობდნენ, მაგრამ, როგორც ვხედავთ და როგორც სტატისტიკიდანაც ჩანს, მათ საკუთარ ეკონომიკას და სამუშაო ადგილებს დაარტყეს“, - განაცხადა პუტინმა.

რუსეთის პრეზიდენტმა ასევე გააკეთა კომენტარი დასავლეთში წამოყენებულ იდეაზე, რომ რუსეთში სახრახნისების და სხვა წვრილმანი საქონლის მიწოდება აიკრძალოს. "ნაკლები შანსი იქნება, რომ ევროპის მსხვილი მეგაპოლისებიდან ჩვენთან ბაღლინჯოების ექპორტი მოხდეს", - განაცხადა პუტინმა.

შეგახსენებთ, რომ რამდენიმე ევროპული ქალაქი, მათ შორის პარიზი, ბოლო თვეების განმავლობაში ბაღლინჯოების გამრავლების საწინააღმდეგო ზომებს იღებს. როგორც მედია წერს, პუტინის ირონიული კომენტარი სწორედ ამას უკავშირდება.