ყაზახეთის პრეზიდენტმა მხარი დაუჭირა ინიციატივას, ქვეყნის დედაქალაქს ნურ-სულთანის ნაცვლად კვლავ ასტანა ეწოდოს
13 სექტემბერი, 2022
ყაზახეთის პრეზიდენტის პრესმდივნის, რუსლან ჟელდიბაის განცხადებით, ყასიმ-ჟომართ თოყაევმა მხარი დაუჭირა დეპუტატების მიმართვას, რომლებიც ქვეყნის დედაქალაქ ნურ-სულთანისთვის ძველი სახელწოდების დაბრუნებას ითხოვენ.
„დეპუტატების წინადადება შეტანილია საკონსტიტუციო ცვლილებების კანონპროექტში. ამასთან, პრეზიდენტი ისტორიულ ფაქტად მიიჩნევს ნურსულთან ნაზარბაევის გადამწყვეტ როლს ყაზახეთის თანამედროვე სახელმწიფოებრიობის განმტკიცებასა და დედაქალაქის ჩამოყალიბებაში“, - აცხადებს რუსლან ჟელდიბაი.
მან ასევე განმარტა, რომ ნურსულთან ნაზარბაევის სახელთან დაკავშირებული სხვა ტოპონიმები არ შეიცვლება.
ყაზახეთის დედაქალაქ ასტანას ნურ-სულთანი 2019 წლის მარტში ეწოდა, მას შემდეგ რაც თავისი ინაუგურაციის დროს ასეთი ინიციატივით ყასიმ-ჟომართ თოყაევი გამოვიდა.
