რამზან კადიროვი - ჩეჩნეთში მობილიზაცია არ გამოცხადდება, გეგმა უკვე გადაჭარბებით შევასრულეთ
23 სექტემბერი, 2022
ჩეჩნეთის ლიდერმა რამზან კადიროვმა „სპეციალური სამხედრო ოპერაციის“ ჩატარებასთან დაკავშირებით ოპერატიულ შტაბთან გამართულ შეხვედრაზე განაცხადა, რომ რესპუბლიკაში მობილიზაცია არ გამოცხადდება. მან ეს იმით ახსნა, რომ უკრაინის ომის დროს რესპუბლიკამ „გეგმა უკვე გადაჭარბებით შეასრულა“.
ჩეჩნეთის ლიდერის გამოსვლა ადგილობრივი სახელმწიფო ტელეკომპანიის ეთერში, ახალი ამბების საღამოს გამოშვებაში გადაიცა. კადიროვის თქმით, უკრაინაში საბრძოლო მოქმედებებში ჩეჩნეთიდან მონაწილეობა უკვე მიიღო 20 ათასმა ადამიანმა და გეგმა 254%-ითაა შესრულებული. რა გეგმაზეა საუბარი, ვის მიერ და როგორ დამტკიცდა ის, კადიროვს არ დაუკონკრეტებია.
ამასთან, კადიროვის განმარტებით, უკვე მოხდა იმ 40-ოდე ქალის ნათესავების მობილიზაცია და უკრაინაში გაგზავნა, რომლებიც გროზნოში ომის საწინააღმდეგო აქციის ჩატარებას ცდილობდნენ. მისივე თქმით, ყველა, ვინც მიტინგზე გამოვა, მათი ქმრების და შვილების ჩათვლით, ფრონტის წინა ხაზზე გაიგზავნება.
