სალომე ზურაბიშვილმა უპატივცემულობა გამოიჩინა არა მხოლოდ საზოგადოების და კონსტიტუციის, არამედ ო’ბრაიენის მიმართ, რომელიც აცხადებდა, რომ კანონზე მსჯელობა მნიშვნელოვანი იქნებოდა, – ამის შესახებ საპარლამენტო უმრავლესობის წევრმა, რატი იონათამიშვილმა განაცხადა.

მისივე თქმით, სალომე ზურაბიშვილი ინსტიტუციებს პატივს არ სცემს.

„სალომე ზურაბიშვილი მოტივირებულია პოლარიზაციაში და არა – შენიშვნებში. მისი ნაბიჯიც ამის დასტურია. სინამდვილეში, მან უპატივცემულობა გამოიჩინა არა მხოლოდ საზოგადოების და კონსტიტუციის, არამედ ო’ბრაიენის მიმართ, რომელიც აცხადებდა, რომ მსჯელობა მნიშვნელოვანი იქნებოდა.

მის სიტყვებსა და ხელმოწერას საზოგადოების შიგნით პატივისცემა არ აქვს და ახლა ამას ქვეყნის გარეთაც გაიგებენ. სალომე ზურაბიშვილზე როცა ვსაუბრობთ, მისი მხრიდან ინსტიტუციების პატივისცემაზე საუბარი რთულია, რადგან ამ ადამიანის მხრიდან ადეკვატური დამოკიდებულება არ გვახსენდება. მას პრეზიდენტის ინსტიტუტის სტატუსი რადიკალური პოლიტიკური ბერკეტი ჰგონია. მას ასე ჰგონია თუ სხვისი დავალებების შემსრულებელია, ამასაც აღარ აქვს მნიშვნელობა, რადგან ისტორიაში შევიდა, როგორც პრეზიდენტის ინსტიტუტის სამარცხვინოდ გამომყენებელი“, – განაცხადა რატი იონათამიშვილმა.

პარლამენტმა „უცხოური გავლენის გამჭვირვალობის შესახებ“ კანონი მესამე მოსმენით 14 მაისს მიიღო. საქართველოს პრეზიდენტმა, სალომე ზურაბიშვილმა „უცხოური გავლენის გამჭვირვალობის შესახებ“ კანონს ვეტო 19 მაისს დაადო. „ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო. ეს კანონი უნდა გაუქმდეს“, – განაცხადა სალომე ზურაბიშვილმა.