რეჯეფ თაიფ ერდოღანი - “მარცვლეულის დერეფნების” გახსნის შესახებ შეთანხმება გაეროს ერთ-ერთი უდიდესი მიღწევაა ბოლო წლების განმავლობაში
20 სექტემბერი, 2022
“მარცვლეულის დერეფნების” გახსნის შესახებ შეთანხმება გაეროს ერთ-ერთი უდიდესი მიღწევაა ბოლო წლების განმავლობაში, - ამის შესახებ თურქეთის პრეზიდენტმა რეჯეფ თაიფ ერდოღანმა გაეროს გენერალურ ასამბლეაზე სიტყვით გამოსვლის დროს განაცხადა.
“ჩვენი და გაეროს გენერალური მდივნის აქტიური ძალისხმევის შედეგად ჩვენ მივაღწიეთ შავი ზღვით უკრაინული მარცვლეულის ექსპორტის განახლებას. ჩვენ ვზრდით ამ მიწოდებების მოცულობას. ეს შეთანხმება, რომელსაც გადამწყვეტი მნიშვნელობა აქვს მარცვლეულის მიწოდების შესანარჩუნებლად, ბოლო წლების განმავლობაში გაეროს ერთ-ერთი უდიდესი მიღწევაა,” - განაცხადა თურქეთის პრეზიდენტმა.
მისი თქმით, სტამბულში მიღწეული შეთანხმებების წყალობით, საერთაშორისო საზოგადოებამ გაეროს მიმართ ნდობა იგრძნო. ამავდროულად, ერდოღანმა უფრო ეფექტური მუშაობისთვის გაეროში ცვლილებების აუცილებლობაზე მიუთითა, კერძოდ, კი გაეროს უშიშროების საბჭოში, ვინაიდან, მსოფლიო “ხუთზე მეტია”.
ერდოღანმა ხაზგასმით აღნიშნა, რომ თურქეთი გააგრძელებს ძალისხმევას, რათა რუსეთის უკრაინის წინააღმდეგ ომი ტერიტორიული მთლიანობისა და დამოუკიდებლობის პრინციპების საფუძველზე დასრულდეს.
მან საერთაშორისო ორგანიზაციებსა და მსოფლიოს ყველა სახელმწიფოს მოუწოდა, რომ “გააერთიანონ ძალისხმევა, რათა იპოვონ გონივრული, სამართლიანი და სიცოცხლისუნარიანი დიპლომატიური გამოსავალი, რომელიც ორივე მხარეს კრიზისიდან ღირსეულად გამოსვლის საშუალებას მისცემს”.
