რეჯეფ თაიფ ერდოღანი „მარცვლეულის შეთანხმების“ საკითხზე რუსეთის, უკრაინისა და გაერო-ს წარმომადგენლებს შორის შეხვედრას აანონსებს
თურქეთის პრეზიდენტი რეჯეფ თაიფ ერდოღანი „მარცვლეულის შეთანხმების“ საკითხზე რუსეთის, უკრაინისა და გაერო-ს წარმომადგენლებს შორის შეხვედრას აანონსებს.
შეხვედრის შესახებ თურქეთის პრეზიდენტმა ჟურნალისტებთან საუბრისას ნიუ-დელიში, „ოცეულის ჯგუფის“ სამიტის შემდეგ განაცხადა. შეხვედრის კონკრეტული ადგილი და თარიღი ერდოღანს არ დაუსახელებია.
თურქეთის პრეზიდენტმა მოუწოდა ყველას, რომ რუსეთი არ იყოს „მარგინალიზებული“ მოლაპარაკებებში, რომლებიც მიზნად ისახავს შავი ზღვის გავლით უკრაინული მარცვლეულის ექსპორტის შესახებ საკვანძო შეთანხმების აღორძინებას.
შეგახსენებთ, რომ ვლადიმერ პუტინი გასულ კვირას თურქეთის პრეზიდენტს სოჭში „მარცვლეულის შეთანხმებაზე“ სასაუბროდ შეხვდა. რეჯეფ თაიფ ერდოღანის მიზანი შეთანხმების აღდგენა იყო, თუმცა ამ შეხვედრამ შედეგი ვერ გამოიღო.
მედიის ცნობით, „ოცეულის ჯგუფის“ სამიტზე ერდოღანმა ლიდერებს მოუწოდა, რუსეთის ზოგიერთი მოთხოვნა შავი ზღვის მარცვლეულის ინიციატივის აღდგენის შესახებ დააკმაყოფილონ.
