როდის დამტკიცდება მესტიის განაშენიანების გენგეგმა? - მერის პასუხი
3 სექტემბერი, 2022
რეგიონებში, რომელიც ტურისტულად მიმზიდველია, ქაოსური განაშენიანება ერთ-ერთი მწვავე პრობლემაა. აღნიშნულ გამოწვევაზე განსაკუთრებით მესტიაში საუბრობენ, სადაც განაშენიანების გეგმაზე მუშაობა წლებია მიმდინარეობს თუმცა, ამ დრომდე, აღნიშნულ არეალს დოკუმენტი, რითაც მესტიის განაშენიანება უნდა მოხდეს არ აქვს.
ყოველივე ეს მესტიას ქაოსური განაშენიანების საფრთხის წინაშე აყენებს. პრობლემაზე სასტუმრო ბიზნესის წარმომადგენლებმაც ისაუბრეს და წუხილი გამოთქვეს, რომ თუ ასე გაგრძელდა მესტია ტურისტებს დაკარგავს, რადგან მათ ადგილზე ის ავთენტური გარემო აღარ დახვდებათ, რის გამოც ისინი მესტიას სტუმრობენ.
მესტიის მერის, კახა ჟორჟოლიანის თქმით, გენგეგმის დამტკიცება დოკუმენტის საჯარო განხილვებსა და მოსახლეობის შენიშვნებზეა დამოკიდებული.
“მესტიის გენგეგმის დიდი ნაწილი დამუშავებულია, ჩაბარებული გვაქვს, მაგრამ დაგვრჩა რაღაც ნაწილი, რომელიც დასამუშავებელია და შესათანხმებელია მოსახლეობასთან. ნოემბრის შემდეგ ველოდებით საჯარო განხილვების დაწყებას. პროცესი იმაზეა დამოკიდებული, თუ რა შენიშვნები ექნება მოსახლეობას,” - ამბობს მესტიის მერი.
ცნობისთვის, მესტიისა და მულახის სივრცითი მოწყობისა და მიწათსარგებლობის გენერალურ გეგმაზე მუშაობა 2016 წელს დაიწყო. მულახის გენგეგმა დამტკიცდა, თუმცა მესტიაში პროცესები ამ დრომდე არ დასრულებულა.
