მიხეილ სააკაშვილის ადვოკატების ინფორმაციით, ექს-პრეზიდენტის ჯანმრთელობის მდგომარეობა გაუარესებულია. სააკაშვილი დღეს კლინიკა "ვივამედში" ადვოკატებმა ვალერი გელბახიანმა და შალვა ხაჭაპურიძემ მოინახულეს.

მათი ინფორმაციით, საქართველოს მესამე პრეზიდენტი ვერ დგება და სხვადასხვა დაავადება აწუხებს, რომელთა შორის ერთ-ერთი ხერხემლის პრობლემაა.

ადვოკატების თქმით, დღეს 5 საათზე ჯანდაცვის სამინისტროში შეხვედრაა დანიშნული, რომელზეც ამერიკელი ექსპერტის, ჯეიმს კობის კლინიკა "ვივამედში" შეშვების საკითხზე იმსჯელებენ.

უნდა აღინიშნოს, რომ რამდენიმე თვეა მიხეილ სააკაშვილის სასამართლო სხდომა მისი ჯანმრთელობის მდგომარეობის გამო ვერ ტარდება. ბოლო სხდომა, რომელზეც მან დასწრება შეძლო, 20 აპრილს გაიმართა.

საქართველოს ექს-პრეზიდენტი მიხეილ სააკაშვილი, რომელსაც ორ საქმეზე 6-წლიანი პატიმრობა აქვს მისჯილი, საქართველოში 2021 წლის სექტემბრის ბოლოს დაბრუნდა და 1 ოქტომბერს დააკავეს. დაკავების დღესვე მიხეილ სააკაშვილმა შიმშილობა გამოაცხადა. მდგომარეობის დამძიმების გამო, შიმშილობის დაწყებიდან 50-ე დღეს ის პროტესტის შეწყვეტას დათანხმდა.

საქართველოს მესამე პრეზიდენტი 12 მაისიდან კლინიკა „ვივამედში“ მკურნალობს. პარალელურად, მისი ადვოკატები და ოჯახის წევრები აცხადებენ, რომ აუცილებელია მიხეილ სააკაშვილის საზღვარგარეთ სამკურნალოდ გადაყვანა.