ვაკის პარკში დაშავებული ბავშვი მართვით სუნთქვაზე იმყოფება და ინტენსიური თერაპიის განყოფილებაში განაგრძობს მკურნალობას, განაცხადა ბავშვთა რეანიმატოლოგმა გიორგი კვიცინაძემ.

ექიმის განცხადებით, მნიშვნელოვანია, რომ პირველი 24 საათის განმავლობაში მოზარდის ჯანმრთელობის მდგომარეობა არ გაუარესებულა.

"აღენიშნებოდა ცხელების ეპიზოდი, თუმცა ამჟამად ტემპერატურა ნორმის ფარგლებშია. ამ ეტაპზე გეგმურად სძინავს საძილე მედიკამენტების მოქმედების ფონზე. კვლევებში თავის ტვინის რაიმე მნიშვნელოვანი პათოლოგიური ცვლილებები ამ ეტაპზე არ აღენიშნება", - განაცხადა კვიცინაძემ.

ამასთან, ექიმმა ბავშვის უცხოეთში ტრანსპორტირებაზეც ისაუბრა და განმარტა, რომ ტრანსპორტირებისას იქმნება გარკვეული რისკები, რადგან ბავშვი მართვით სუნთქვაზე იმყოფება.

გუშინ, დღის პირველ ნახევარში ვაკის პარკში თამაშისას ბავშვებს ბურთი შადრევანში ჩაუვარდათ, მისი ამოღების დროს, სამ არასრულწლოვანს დენმა დაარტყა. ორი მათგანი ხეჩინაშვილის, ერთი კი, იაშვილის კლინიკაში გადაიყვანეს. ერთ-ერთი არასრულწლოვანი კლინიკაში გარდაიცვალა.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 240-ე პრიმა მუხლის პირველი ნაწილით დაიწყო, რაც ელექტრო ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას გულისხმობს.