ბაიდენის ადმინისტრაცია აპირებს უკრაინას ჯავშანსატანკო საბრძოლო მასალები გაუგზავნოს, რომლებიც გაღარიბებულ ურანს შეიცავს. ამის შესახებ სააგენტო "როიტერი" წყაროებზე დაყრდნობით იუწყება. აღსანიშნავია, რომ აშშ უკრაინას ურანის შემცველ საბრძოლო მასალას პირველად გადასცემს.

საბრძოლო მასალა, რომელიც შეიძლება უკრაინას რუსული ტანკების განადგურებაში დაეხმაროს, უკრაინის სამხედრო დახმარების ახალი პაკეტის ნაწილია, რომელიც მომავალ კვირაში იქნება წარმოდგენილი. საბრძოლო მასალის გასროლა შესაძლებელია ამერიკული "აბრამსის" ტანკებიდან, რომლებიც, გავრცელებული ინფორმაციით, უკრაინას უახლოეს კვირებში მიეწოდება.

ერთ-ერთი წყაროს ინფორმაციით, მომავალი დახმარების პაკეტის ღირებულება 240-დან 375 მილიონ აშშ დოლარამდე იქნება, იმისდა მიხედვით, თუ რა შევა მასში.

ცნობისთვის, დიდმა ბრიტანეთმა უკვე გადასცა უკრაინას გაღარიბებული ურანის შემცველი საბრძოლო მასალა. რუსეთის პრეზიდენტმა, ვლადიმირ პუტინმა ამ ნაბიჯს „ბირთვული ესკალაცია“ უწოდა. თავის მხრივ, ლონდონში კრემლის ბრალდება უარყვეს და განაცხადეს, რომ რუსეთს არანაირი საფრთხე არ ემუქრება, ხოლო აღნიშნული საბრძოლო მასალა უკრაინას თავდაცვისთვის სჭირდება.