ვატიკანის გადაწყვეტილებით, კათოლიკურ ეკლესიაში ტრანსგენდერებს მონათვლა და ნათლიობა შეეძლებათ. ამის შესახებ ინფორმაციას „როიტერი“ ავრცელებს.

სააგენტოს ცნობით, შეკითხვებით ლგბტ თემის წარმომადგენლების ნათლობისა და ქორწინების წმინდა რიტუალებში მონაწილეობასთან დაკავშირებით წმინდა საყდარს ბრაზილიის ეპისკოპოსმა სანტო ამაროდან, ხოსე ნეგრიმ ივლისში მიმართა.

ტრანსგენდერების ნათლობასთან დაკავშირებით ვატიკანის რწმენის დოქტრინის დეპარტამენტის პასუხი დადებითი იყო, თუმცა, მათი განმარტებით ამან „არ უნდა შექმნას საჯარო სკანდალის ან მორწუნეებში დეზორიენტაციის გამოწვევის რისკი“.

ვატიკანის პასუხში ასევე აღნიშნულია, რომ ტრანსგენდერ პირებს შეუძლიათ გახდნენ ნათლიები ან ჯვრისწერის მოწმეები და თავადაც მოინათლონ. ეს ყველაფერი ადგილობრივი სასულიერო პირის შეხედულებისამებრ უნდა მოხდეს. თუმცა, გადაწყვეტილების მიღებისას მღვდელს მოუწევს გამოიჩინოს „პასტორალური წინდახედულობა“. ჯვრისწერის მოწმედ ყოფნა შეუძლია ჰომოსექსუალური იდენტობის პირსაც.

„როიტერის“ ინფორმაციით, ვატიკანის რწმენის დოქტრინის დიკასტერიამ ბუნდოვანი პასუხი გასცა კითხვას, შეძლებენ თუ არა ერთნაირსქესიანი წყვილები აყვანილი შვილის ან სუროგატი დედის მიერ გაჩენილი ბავშვის მონათვლას. როგორც დეპარტამენტში განმარტავენ, ამისათვის უნდა იყოს საფუძვლიანი იმედი, რომ ბავშვი „განათლებას კათოლიკური რელიგიის მიხედვით მიიღებს“.

რაც შეეხება ჰომოსექსუალური იდენტობის პირთა ნათლიობას, „როიტერი“ აღნიშნავს, რომ ამ შემთხვევაში დიკასტერიის პასუხი დადებითი, თუმცა ბუნდოვანია – შესაძლებელია, თუმცა, ადამიანი „რწმენის შესაბამისი ცხოვრებით“ უნდა ცხოვრობდეს.