რუსეთმა სამოქალაქო ავიაციის საერთაშორისო ორგანიზაციის (ICAO) მმართველ საბჭოში ადგილი დაკარგა. ინფორმაციას „როიტერი“ ავრცელებს.

სააგენტოს ცნობით, რუსეთმა გაერო-ს დაქვემდებარებაში მყოფი საავიაციო სააგენტოს მმართველ საბჭოში ხელახლა ასარჩევად საკმარისი ხმები ვერ მოიპოვა. ამის მიზეზი კი საავიაციო საქმიანობასთან დაკავშირებული ის ქმედებებია, რომლებიც უკრაინაში ომის დაწყების შემდეგ ჩაიდინა. კერძოდ, რუსეთმა ვერ მოაგროვა 86 ხმა, რომელიც საჭიროა საერთაშორისო სამოქალაქო ავიაციის ორგანიზაციის (ICAO) 36 ქვეყნისგან შემდგარ მმართველ საბჭოში დასარჩენად. სააგენტოს ასამბლეა მონრეალში 7 ოქტომბრამდე გაგრძელდება.

ასამბლეის პრეზიდენტმა და სამხრეთ აფრიკის სამოქალაქო ავიაციის გენერალურმა დირექტორმა, პოპი ხოზამ გარემოებებს "უპრეცედენტო" უწოდა. ორგანიზაციაში რუსეთის წარმომადგენლის განცხადებით, "მიღებული შედეგები პოლიტიკური ხასიათისაა და არ უკავშირდება რუსეთის საქმიანობას სამოქალაქო ავიაციის მიმართულებით".

უკრაინის წარმომადგენლის თქმით, კენჭისყრა ადასტურებს, რომ რუსეთს უნდა დაეკისროს პასუხისმგებლობა უკრაინის სუვერენული საჰაერო სივრცის დარღვევის, მათ შორის აეროპორტების დაბომბვის გამო, რაც ეწინააღმდეგება 1944 წლის შეთანხმებას და გლობალური ავიაციის ძირითად პრინციპებს.

როგორც სააგენტო წერს, დასავლეთში ასევე განაცხადეს, რომ რუსეთმა უკანონოდ მიითვისა ასობით უცხოური თვითმფრინავი, რასაც მოსკოვი უარყოფს. მარტში რუსეთმა ქვეყნის ავიაკომპანიებს უფლება მისცა, უცხოური კომპანიებისგან იჯარით აღებული თვითმფრინავები რუსეთის თვითმფრინავების რეესტრში გაეტარებინათ.