აზერბაიჯანმა შაბათს განაცხადა, რომ ღამით სომხურმა ძალებმა მის ჯარებს ცეცხლი გაუხსნეს და რომ აზერბაიჯანის არმიის ნაწილებმა "საპასუხო ზომები" მიიღეს. სომხეთის მხარე აღნიშნულ ინციდენტს უარყოფს. ინფორმაციას ამის შესახებ „როიტერი” ავრცელებს.

აზერბაიჯანის თავდაცვის სამინისტროს განცხადებით, სომხურმა ქვედანაყოფებმა აზერბაიჯანელ ჯარისკაცებს ცეცხლი სადარაქში, ნახჩევანის ჩრდილოეთით გაუხსნეს, რომელიც სომხეთს, თურქეთსა და ირანს ესაზღვრება.

სამინისტროს განცხადებაში არ არის აღნიშნული, მოჰყვა თუ არა შემთხვევას მსხვერპლი. სომხეთის თავდაცვის სამინისტრო უარყოფს ფაქტს, რომ მისმა ძალებმა აზერბაიჯანის პოზიციებს ცეცხლი გაუხსნეს.

სომხეთის მთავრობამ განაცხადა, რომ შაბათს ქვეყნის პრემიერ-მინისტრმა, ნიკოლ ფაშინიანმა სატელეფონო საუბრები გამართა საფრანგეთის, გერმანიის, ირანისა და საქართველოს ლიდერებთან და აშშ-ის სახელმწიფო მდივანთან ენტონი ბლინკენთან. აზერბაიჯანმა განაცხადა, რომ მისმა საგარეო საქმეთა მინისტრმა სიტუაცია აშშ-ის სახელმწიფო დეპარტამენტის მაღალჩინოსნთან, იური კიმთან განიხილა.

სომხური მხარის ცნობით, სატელეფონო საუბრებში ფაშინიანმა აღნიშნა, რომ საზღვარზე დაძაბულობა მატულობს და აზერბაიჯანი მთიანი ყარაბაღის გარშემო ჯარების მობილიზაციას ახდენს. ოფიციალურმა ბაქომ აღნიშნული ინფორმაცია უარყო და თავის მხრივ, სომხეთი ჯარების მობილიზებაში დაადანაშაულა.

ფაშინიანმა განაცხადა, რომ დაძაბულობის განმუხტვის მიზნით, იგი მზადაა სასწრაფოდ გამართოს შეხვედრა აზერბაიჯანის პრეზიდენტ ილჰამ ალიევთან. თუმცა, როგორც პრეზიდენტ ალიევის მრჩეველმა საგარეო პოლიტიკის საკითხებში, ჰიკმეტ ჰაჯიევმა Reuters-ს განუცხადა, ბაქოს ასეთი შეთავაზება არ მიუღია.

„როიტერის“ ცნობით, ბაქოსა და ერევნის მცხოვრებლებმა სააგენტოსთან საუბარში განაცხადეს, რომ ორ ქვეყანას შორის ახალი ომის ეშინიათ.