კვირას შეიარაღებული პირები კოსოვოს ეთნიკური სერბებით დასახლებული რეგიონის სოფელში ჯავშანტექნიკით შეიჭრნენ, პოლიციას ცეცხლი გაუხსნეს და სერბულ მართლმადიდებლურ მონასტერში გამაგრდნენ.

„როიტერის“ ინფორმაციით, კოსოვოს პოლიციის განცხადებით, სოფელ ბანისკას გარშემო სროლის დროს ერთი ოფიცერი და სამი თავდამსხმელი დაიღუპა.

პოლიციის ინფორმაციით, თავდასხმაში სულ 30-მდე პირი მონაწილეობდა. ისინი ამჟამად მონასტერში არიან გამაგრებულები, რომლისთვისაც სამართალდამცველებს უკვე რამდენიმე საათია ალყა აქვთ შემორტყმული. სერბული ეკლესიის ცნობით, ბერები და მომლოცველები მონასტრის ტაძარში არიან ჩაკეტილები.

ვინ დგას თავდასხმის უკან უცნობია, თუმცა, კოსოვოს ხელისუფება მომხდარში „სერბეთის მიერ დაფინანსებულ კრიმინალებს“ ადანაშაულებს.

„ისინი არიან პროფესიონალები, სამხედრო და პოლიციის გამოცდილებით“, – განაცხადა კოსოვოს პრემიერმა ალბინ კურტიმ, რომელმაც მონასტერში შეჭრილ შეიარაღებულ პირებს ჩაბარებისკენ მოუწოდა.