რომის პაპმა ფრანცისკემ შაბათს გამოთქვა მოსაზრება იმის თაობაზე, რომ ზოგიერთი ქვეყანა უკრაინას "ეთამაშება“ - ჯერ იარაღს აწვდის, შემდეგ კი ვალდებულებების შესრულებაზე უარს ამბობს. ინფორმაციას ამის თაობაზე სააგენტო Reuters ავრცელებს.

ამის შესახებ კომენტარი რომის პაპმა საფრანგეთის საპორტო ქალაქ მარსელიდან დაბრუნებისას, თვითმფრინავის ბორტზე გააკეთა. კითხვაზე, იყო თუ არა იმედგაცრუებული, რომ მშვიდობის დამყარების მცდელობამ შედეგი არ გამოიღო, პაპმა უპასუხა, რომ ის გარკვეულ იმედგაცრუებას გრძნობს ამ საკითხის მიმართ. პაპის განმარტებით, მან ელჩი, იტალიელი კარდინალი მატეო ზუპი, კიევში, მოსკოვში, ვაშინგტონსა და პეკინში იქაურ ლიდერებთან შესახვედრად გაგზავნა.

„მეჩვენება, რომ ამ ომში ინტერესები არ არის მხოლოდ უკრაინა-რუსეთის პრობლემასთან დაკავშირებული, არამედ იარაღის გაყიდვასთან, იარაღით ვაჭრობასთან,“ – თქვა რომის პაპმა.

როგორც პაპი ფრანცისკე აღნიშნავს, მსოფლიომ უკრაინელი ხალხის „მოწამეობით“ არ უნდა ითამაშოს, არამედ, უნდა დაეხმაროს მათ ამ პრობლემის მოგვარებაში.

"ვხედავ, რომ ზოგიერთი ქვეყანა უკან იხევს და არ სურს უკრაინისთვის იარაღის მიწოდება. იწყება პროცესი, რომლითაც უკრაინელი ხალხი დაზარალდება, რაც მე ძალიან არ მომწონს“, - აცხადებს რომის პაპი.