„როსავიაცია“ ადასტურებს, რომ ტვერის ოლქში ჩამოვარდნილი თვითმფრინავის ბორტზე ევგენი პრიგოჟინი და დმიტრი უტკინი იმყოფებოდნენ
რუსეთის საჰაერო ტრანსპორტის ფედერალურმა სააგენტომ დაადასტურა, რომ თვითმფრინავში, რომელიც ტვერის ოლქში ჩამოვარდა, „ვაგნერის“ ხელმძღვანელი ევგენი პრიგოჟინი და ამავე დაჯგუფების მეთაური დმიტრი უტკინი იმყოფებოდნენ.
„როსავიაციის“ ცნობით, Embraer - 135 (EBM-135BJ)-ის ბორტზე იმყოფებოდნენ მგზავრები: სერგეი პროპუსტინი, ევგენი მაკარიანი, ალექსანდრ ტოტმინი, ვალერი ჩეკალოვი, დმიტრი უტკინი, ნიკოლაი მატუსეევი და ევგენი პრიგოჟინი; ასევე, ეკიპაჟის წევრები: მეთაური ალექსეი ლავშინი, მეორე პილოტი რუსტამ კარიმოვი და ბორტგამცილებელი კრისტინა რასპოპოვა.
"თვითმფრინავის ფრენა განხორციელდა საჰაერო სივრცით სარგებლობის დადგენილი წესით გაცემული ნებართვის საფუძველზე", - ნათქვამია განცხადებაში.
მედიაში გავრცელებული ინფორმაციით, ბორტზე მყოფი ათივე ადამიანის ცხედარი უკვე ამოასვენეს და სამძებრო სამუშაოები დასრულებულია. ამის შესახებ სააგენტო „ინტერფაქსი“ სასწრაფო დახმარების სამსახურზე დაყრდნობით იტყობინება.
