რუსეთის საგანგებო სიტუაციების სამინისტროს ცნობით, ტვერის ოლქში კერძო თვითმფრინავის ჩამოვარდნას ბორტზე მყოფი ყველა ადამიანი ემსხვერპლა. რუსეთის საჰაერო ტრანსპორტის ფედერალური სააგენტოს განცხადებით, მგზავრთა სიაში იყო ევგენი პრიგოჟინიც.

"ბორტზე 10 ადამიანი იმყოფებოდა, მათგან 3 ეკიპაჟის წევრია, წინასწარი ინფორმაციით, ავიაკატასტროფის შედეგად ყველა მათგანი დაიღუპა", - ნათქვამია გავრცელებულ ინფორმაციაში.

როგორც საგანგებო სიტუაციების სამინისტროში აზუსტებენ, კერძო თვითმფრინავი Embraer Legacy მოსკოვიდან სანკტ-პეტერბურგში მიფრინავდა და კუჟენკინოს დასახლებულ პუნქტთან ჩამოვარდა. კატასტროფის ადგილზე ამ წუთებში მაშველები მუშაობენ.

სააგენტოს ცნობით, მგზავრებს შორის არის ევგენი პრიგოჟინის სახელი და გვარიც, თუმცა, ნამდვილად იმყოფებოდა თუ არა იგი ბორტზე, ამ დროისთვის ჯერჯერობით უცნობია.

მედიაში გავრცელებული ინფორმაციით, აღნიშნული თვითმფრინავი „ვაგნერის“ დამფუძნებელს ევგენი პრიგოჟინს ეკუთვნოდა.