რუმინეთის მართლმადიდებელი ეკლესიის მოწვევითა და საქართველოს საელჩოს ხელშეწყობით, საპატრიარქოს დელეგაცია სრულიად საქართველოს კათოლიკოს-პატრიარქის ქორეპისკოპოსის, ახალციხისა და ტაო-კლარჯეთის მიტროპოლიტ თეოდორეს (ჭუაძე) ხელმძღვანელობით რუმინეთს ეწვია. დელეგაციაში იყვნენ სოფ. უდეს (ანთიმოზ ივერიელის დაბადების ადგილის) მონასტრის წინამძღვარი, არქიმანდრიტი გრიგოლ ქურციძე და სხვა სასულიერო პირები, ასევე ახალციხის საბავშვო-ფოლკლორული ანსამბლი „ირმისა“.

27 სექტემბერს, წმინდა ანთიმოზ ივერიელის ხსენების დღეს, ქართველმა სასულიერო პირებმა საღვთო ლიტურგიაში მიიღეს მონაწილეობა, რომელიც რიმნიკუ-ვილჩას საკათედრო ტაძარში აღესრულა.

ლიტურგიის დასრულების შემდეგ, ანსამბლ „ირმისას“ წევრებმა ქართული სიმღერები შეასრულეს, ხოლო იმავე საღამოს - კონცერტი გამართეს.

საქართველოს დელეგაციამ კოზიასა და გოვორას მონასტრები მოინახულა, სადაც წმინდა ანთიმოზ ივერიელის პერიოდის ფრესკებია შემონახული.

ვიზიტის მეორე დღეს საქართველოს დელეგაცია ბუქარესტს ეწვია, მოინახულა ანთიმოზ ივერიელის მონასტერი, საპატრიარქოს საკათედრო ტაძარი და რადუ ვოდას მონასტერი, სადაც საბავშვო ანსამბლ „ირმისას“ წევრებმა ქართული საგალობლები შეასრულეს. ანსამბლმა რუმინული აუდიტორიის წინაშე დიდი მოწონება დაიმსახურა.

დელეგაცია რუმინეთიდან ბულგარეთში გაემგზავრა, სადაც პეტრიწონის მონასტერი მოილოცეს. ბულგარეთში სტუმრობა საქართველოს საელჩოს ხელშეწყობით განხორციელდა.

დელეგაცია საქართველოში 29 სექტემბერს დაბრუნდა.

ინფორმაციას საქართველოს საპატრიარქოს საზოგადოებასთან ურთიერთობის სამსახური ავრცელებს.