3 სექტემბერი, 2022

რუსეთმა შეერთებული შტატებისგან 56 ვიზა გამოითხოვა, იმისთვის, რომ რუსეთის საგარეო საქმეთა მინისტრს, სერგეი ლავროვსა და მის დელეგაციას გაეროში გამართული მსოფლიო ლიდერების ყოველწლიურ შეკრებაზე დასასწრებად ნიუ-იორკში გამგზავრების საშუალება მიეცეთ. თუმცა, ჯერჯერობით, მათ არცერთი ვიზა არ მიუღიათ.

Reuters-ის ცნობით, ამის შესახებ გაეროს გენერალური მდივნის, ანტონიო გუტერეშისადმი წერილში გაეროში რუსეთის ელჩი, ვასილი ნებენზია წერს. ნებენზიას განცხადებით, ეს „შემაშფოთებელი“ ფაქტია, ვინაიდან ბოლო რამდენიმე თვის განმავლობაში ვაშინგტონი რუსეთის ფედერაციის დელეგატებს „მუდმივად უარს ეუბნებოდა ვიზების გაცემაზე“ გაეროს სხვა ღონისძიებებზე დასასწრებად.

აშშ-ის სახელმწიფო დეპარტამენტის წარმომადგენლის თქმით, ამერიკის შეერთებული შტატები, როგორც გაეროს მასპინძელი ქვეყანა, სერიოზულად ეკიდება თავის ვალდებულებებს და დასძინა, რომ სავიზო ინფორმაცია აშშ კანონმდებლობის თანახმად კონფიდენციალურია, შესაბამისად, მას არ აქვს ცალკეულ შემთხვევებზე კომენტარის გაკეთების უფლება.

1974 წლის გაეროს „შტაბბინის შეთანხმების“ თანახმად, აშშ ზოგადად ვალდებულია გაეროს სხდომებზე დაუშვას უცხო ქვეყნის დიპლომატიური კორპუსის წარმომადგენლები. მაგრამ, ვაშინგტონის თქმით, მათ აქვთ უფლება უარი თქვან ვიზების გაცემაზე „უსაფრთხოების, ტერორიზმის და საგარეო პოლიტიკის“ საბაბით.

აშშ-მა სერგეი ლავროვს სანქციები 26 თებერვალს, უკრაინის მოვლენებთან დაკავშირებით დაუწესა.