რუსეთის ფედერალური უსაფრთხოების სამსახური ადასტურებს, რომ ზემო ლარსის სასაზღვრო გამშვებ პუნქტზე კონტროლს აძლიერებს
26 სექტემბერი, 2022
რუსეთის ფედერალური უსაფრთხოების სამსახური ადასტურებს გავრცელებულ ცნობას, რომ ზემო ლარსის სასაზღვრო გამშვები პუნქტის მიმართულებით ჯავშანტრანსპორტიორი მიემართება, რომელიც საზღვარზე წესრიგის უზრუნველსაყოფად არის განკუთვნილი.
„ჯავშანტრანსპორტიორი მიემართება არა ბლოკ-პოსტების მოსაწყობად, არამედ, უხეშად რომ ვთქვათ, რეზერვია გაუთვალისწინებელი შემთხვევისთვის, თუ რეზერვისტები მოინდომებენ გამშვები პუნქტის გარღვევას და ქვეყნის ყოველგვარი სასაზღვრო ფორმალობების გარეშე დატოვებას. არავითარი ბლოკ-პოსტების განთავსებას არ ვაპირებთ.
საკონტროლო გამშვები პუნქტი საშტატო რეჟიმში მუშაობს, არავითარი შეზღუდვა გაწვევის ასაკის მქონე მამრობითი სქესის მოქალაქეების გასვლაზე არ შემოღებულა“, – აცხადებს რუსეთის სასაზღვრო სამმართველოს თანამშრომელი.
როგორც კრემლში აცხადებენ, ნაწილობრივი მობილიზაციის გამოცხადების და ქვეყნის დატოვების მოლოდინში მყოფი ავტომობილების გრძელი რიგების ფონზე, რუსეთის ხელისუფლებას საზღვრების დაკეტვის შესახებ გადაწყვეტილება არ მიუღია.
"არაფერი ვიცი ამის შესახებ. ამ დროისთვის ამ საკითხზე გადაწყვეტილება მიღებული არ არის", - აღნიშნა კრემლის პრესსპიკერმა, დიმიტრი პესკოვმა.
ამასთან, როგორც „ბიბისი“ წერს, რუსეთში მობილიზაციის გამოცხადების შემდეგ, აქტიურად ვრცელდება ხმები, რომ ხელისუფლებამ შესაძლოა, საომარი მდგომარეობა გამოაცხადოს და საზღვრები ჩაკეტოს.
