რუსეთის საგამოძიებო კომიტეტის ცნობით, ყირიმის ხიდზე მომხდარ აფეთქებას სამი ადამიანი ემსხვერპლა. წინასწარი მონაცემებით, ისინი იმ მსუბუქი ავტომობილის მგზავრები არიან, რომელიც აფეთქების მომენტში სატვირთო მანქანის მახლობლად იმყოფებოდა.

გამომძიებლებმა ასევე დაადგინეს სატვირთო ავტომობილისა და მისი მფლობელის მონაცემები - ესაა რუსეთის კრასნოდარის მხარის მაცხოვრებელი. როგორც იტყობინებიან, მის საცხოვრებელ ადგილზე საგამოძიებო სამუშაოები მიმდინარეობს.

გავრცელებული ინფორმაციით, სატვირთო ავტომობილი ბორის იუსუბოვის სახელზეა რეგისტრირებული. ნათესავების თქმით, მან ავტომობილი გაყიდა, მაგრამ მფლობელმა ის საკუთარ სახელზე არ გადააფორმა.

შეგახსენებთ, რომ ყირიმის ხიდზე, რომელიც ნახევარკუნძულს რუსეთთან აკავშირებს, შაბათ დილით აფეთქება მოხდა. შედეგად ძლიერი ხანძარი გაჩნდა, ხოლო, საავტომობილო ხიდის ნაწილი ჩაინგრა. რუსეთში აფეთქებასთან დაკავშირებით სამთავრობო საგამოძიებო კომისია შეიქმნა.