ტვერის ოლქში მომხდარი ავიაკატასტროფის შედეგად დაღუპული ათივე ადამიანის ვინაობა შეესაბამება ფრენის ფურცელში მითითებულ სახელობით სიას. ინფორმაციას ამის შესახებ მედია საგამოძიებო კომიტეტზე დაყრდნობით ავრცელებს.

"ტვერის ოლქში მომხდარი ავიაკატასტროფის გამოძიების ფარგლებში დასრულდა მოლეკულური გენეტიკური გამოკვლევები. მათი შედეგების მიხედვით, ათივე გარდაცვლილის ვინაობა დადგენილია, ისინი შეესაბამება ფრენის ფურცელში მითითებულ სიას", - აცხადებენ უწყებაში.

შეგახსენებთ, რომ კერძო თვითმფრინავი Embraer Legacy ოთხშაბათს საღამოს ტვერის ოლქში, კუჟენკინოს დასახლებული პუნქტის მახლობლად ჩამოვარდა. ბორტზე ათი ადამიანი იმყოფებოდა, მათ შორის ეკიპაჟის სამი წევრი. ავიაკატასტროფის შედეგად ათივე მათგანი დაიღუპა. დაღუპულებს შორის არიან სამხედრო კომპანია „ვაგნერის“ ხელმძღვანელები ევგენი პრიგოჟინი და დიმიტრი უტკინი.