რუსული კოსმოსური ხომალდი Luna-25 მთვარეს შეეჯახა და განადგურდა, - ამის შესახებ ინფორმაციას REUTERS რუსეთის კოსმოსურ სააგენტოზე დაყრდნობით ავრცელებს.

Luna-25 უნდა ყოფილიყო პირველი ხომალდი, რომელიც მთვარის სამხრეთ პოლუსზე დაეშვებოდა. მისიის მთავარი მიზანი მთვარეზე დაშვებიდან მომდევნო ერთის წლის განმავლობაში მუშაობა და სხვა სადგურების დასაფრენად მომზადება იყო.

„როსკოსმოსის“ განცხადებაში წერია, რომ აპარატი არაპროგნოზირებად ორბიტაზე გადავიდა და მთვარის ზედაპირთან შეჯახების შედეგად არსებობა შეწყვიტა. მისიის ჩაშლის მიზეზებს სპეციალური კომისია შეისწავლის.

Luna-25 ხომალდმა 11 აგვისტოს რუსეთის შორეულ აღმოსავლეთში, ამურის რეგიონში მდებარე „ვოსტოჩნის“ კოსმოდრომიდან აიღო სტარტი და მიმდინარე კვირას წარმატებით გავიდა მთვარის ორბიტაზე. ბოლო 47 წლის განმავლობაში, ეს მთვარეზე რუსეთის პირველი მისია იყო.