22 აგვისტო, 2022

ლიტერატურული პრემია „საბას" ჟიურიმ „საუკეთესო ქართული თარგმანის“ ფინალისტები დაასახელა - 82 საკონკურსო წიგნიდან 12 ფინალისტი გამოვლინდა.

„თიბისის“ ცნობით, წელს საუკეთესო წიგნებსა და ავტორებს ჟიური 9 ნომინაციაში გამოავლენს.

ამასთან ინფორმაციაში აღნიშნულია, რომ ფინალისტების სია 8 ნომინაციაში უკვე ცნობილია, ხოლო „ლიტერატურის განვითარებაში შეტანილი განსაკუთრებული წვლილისთვის“ ნომინაციის გამარჯვებული, ტრადიციულად, უშუალოდ დაჯილდოების ცერემონიაზე გახდება ცნობილი.

„ლიტერატურული პრემია „საბას“ 2022 წლის „საუკეთესო ქართული თარგმანის“ ფინალისტები არიან: მაია ბადრიძე, რობერტ მუზილის „ყმაწვილი ტერლესის სულიერი შფოთვა“ (დიოგენე), კატია ვოლტერსი, ოლგა ტოკარჩუკის „წიგნები იაკობისა ანუ დიდი მოგზაურობა“ (ინტელექტი), დალი იაშვილი, მარსელ პრუსტის „შეღერებულ ქალიშვილთა ჩრდილში“ (არტანუჯი), დავით კაკაბაძე, არტურ შნიცლერის „კაზანოვას დაბრუნება“ (სეზან ფაბლიშინგი), ლანა კალანდია, ხავიერ მარიასის „ბერტა ისლა“ (ინტელექტი), გიორგი ლობჟანიძე, ჯალალ ედ-დინ რუმის „არსთა მესნევი: წიგნი მეორე“, (სულაკაურის გამომცემლობა), ნათია მერებაშვილი და მარიამ წიკლაური, იოჰან ლუდვიგ რუნებერგის „მედროშე სტოლის ნაამბობი” (MTP), მაია ფანჯიკიძე, პეტერ ჰანდკეს „მორავული ღამე“ (ინტელექტი), თაკო ჭილაძე, ჰენრი ფილდინგის „ტომ ჯონსის, ნაპოვარას ამბავი“ (არტანუჯი), ზაზა ჭილაძე და გია ჭუმბურიძე, პიტერ კერის „კელის საძმოს უტყუარი ამბავი“ (დიოგენე), პაატა ჯავახიშვილი, მატიას ენარის „კომპასი“ (დიოგენე), თამარ ჯაფარიძე, ბერნარდინ ევარისტოს „გოგონა, ქალი და სხვა დანარჩენი” (პალიტრა L).

„საბა“ „თიბისიმ“ და რატი ამაღლობელმა 2003 წელს დააფუძნეს, წელს კი კონკურსისთვის საიუბილეო თარიღია, ის მეოცედ ტარდება“, - აღნიშნულია ინფორმაციაში.