საქართველოს ნაკრების თავდამსხმელის, გიორგი მიქაუტაძის მსურველთა რიგებს, როგორც ჩანს, მარსელის ოლიმპიკიც შეუერთდა.

ფრანგული გამოცემა le10sport იტყობინება, რომ გუნდი 22 წლის ქართველი ფეხბურთელით დაინტერესებულია, თუმცა, ჯერჯერობით, ფინანსურ დეტალებზე ცნობილი არაფერია.

წყაროს თანახმად, მარსელის პრეზიდენტი პაბლო ლონგორია გიორგის თამაშით გასულ სეზონში მოიხიბლა და ფეხბურთელის წარმომადგენლებს თავისი აზრი უკვე გააცნო.

პრობლემა ისაა, რომ ოლიმპიკმა მიქაუტაძის შეძენამდე სხვა ფეხბურთელები უნდა გაყიდოს, რათა ტრანსფერისთვის საჭირო ბიუჯეტი გამონახოს. მანამდე ცნობილი გახდა, რომ მიქაუტაძით ინგლისური შეფილდ იუნაიტედიც ინტერესდება, რომელმაც მეცს 18 მილიონი ევრო უკვე შესთავაზა.

მეცთან მიქაუტაძეს კონტრაქტი 2026-წლამდე აქვს გაფორმებული. ფრანგული კლუბი მის სანაცვლოდ მინიმუმ 20 მილიონ ევროს ითხოვს. ადრე საუბარი იყო რომის ლაციოსა და ბარნლიზე, მაგრამ ეს ვარიანტები პრაქტიკულად ჩაიშალა, რადგან იტალიელებმაც და ინგლისელებმაც უკვე სხვა ფორვარდები დაიმატეს.

აგრეთვე განიხილება ლიონის ვარიანტიც, მაგრამ "ლომებს" ჯერ ქმედითი ნაბიჯი ტრანსფერისთვის არ გადაუდგამთ.

შეგახსენებთ, რომ გიორგი მიქაუტაძე გასულ სეზონში 23 გოლით ლიგა 2-ის საუკეთესო ბომბარდირი გახდა, ასევე დასახელდა სეზონის საუკეთესო ფეხბურთელად.

ის ამჟამად ახალი სეზონისთვის მეცთან ერთად ემზადება, რომლის რიგებში ორ საკონტროლო მატჩში 2 გოლი გაიტანა. მეცი ლიგა 1-ის პირველ ტურში 13 აგვისტოს სტუმრად რენს დაუპირისპირდება.