საქართველოს აეროპორტების გაერთიანება ამბროლაურის მიმართულებით დამატებით რეისებს ნიშნავს
19 აგვისტო, 2022
„გემო - ფესტი 2022“-თან დაკავშირებით საქართველოს აეროპორტების გაერთიანება დამატებით ორ რეისს ნიშნავს.
აეროპორტების გაერთიანების ინფორმაციით, 25 აგვისტოს ნატახტარი-ამბროლაურის მიმართულებით დამატებითი რეისი 16:00 საათზე შესრულდება, 28 აგვისტოს რეგულარულის გარდა, დამატებითი რეისი ამბროლაურიდან ნატახტრის მიმართულებით 14:10 საათზე შესრულდება.
„გემო - ფესტი 2022“ ტურიზმის ეროვნული ადმინისტრაციის ორგანიზებითა და გერმანიის საერთაშორისო თანამშრომლობის საზოგადოების (GIZ) ხელშეწყობით 26-27 აგვისტოს ამბროლაურის ცენტრალურ პარკში იმართება.
„გემო ფესტის” მიზანია ადგილობრივი სამზარეულოს პოპულარიზაცია და გასტრონომიული მიმართულებით ახალი ტურისტული სერვისების განვითარება.
გემრიელი ჭამა-სმის ფესტივალი წელს ამბროლაურში პირველად გაიმართება. 2022 წლის შემდეგ კი ყოველწლიური ფესტივალის სახეს მიიღებს. იმოგზაურეთ რაჭაში ამბროლაურის აეროპორტიდან და აღმოაჩინეთ ტრადიციული რაჭული კერძების ახალი გემოები!“- ნათქვამია გავრცელებულ ინფორმაციაში.
