საქართველო – ჩეხეთის საფეხბურთო მატჩზე დასასწრები ყველა ბილეთი გაიყიდა, – ინფორმაცია ფეხბურთის ფედერაციამ დაადასტურა.

შეხვედრის ბილეთების გაყიდვა დღეს, 12:00 საათზე დაიწყო, თითოეულ მომხმარებელს კი, მაქსიმუმ, ორი ბილეთის შეძენა შეეძლო.

ეროვნული ნაკრები ევროპის ჩემპიონატის შემდეგ პირველ შეხვედრას თბილისში, 7 სექტემბერს, 20 საათზე მიხეილ მესხის სახელობის სტადიონზე გამართავს. საქართველოს ნაკრები ამ შეხვედრით ერთა ლიგის B1 ჯგუფში ასპარეზობას იწყებს, სადაც ჩვენი მეტოქეები, ჩეხეთის გარდა, ალბანეთისა და უკრაინის ნაკრებები იქნებიან.

მაღალი მოთხოვნის გამო 12:57 საათზე ბილეთის ყიდვა უკვე შეუძლებელი იყო, რადგან დარეგისტრირებული მყიდველის რიგის ნომერი 100 ათასს გადასცდა.

მიხეილ მესხის სახელობის სტადიონი 2023 წელს ახალგაზრდულ ევროპის ჩემპიონატამდე ჩატარებული სარეაბილიტაციო სამუშაოების შემდეგ 27 223 მაყურებელს იტევს.