13 სექტემბერი, 2022

ევროპის რეკონსტრუქციისა და განვითარების ბანკის (EBRD) პრეზიდენტი ოდილ რენო-ბასო აღნიშნავს, რომ საქართველოსთვის რეგიონულ სატრანსპორტო-ლოგისტიკურ ჰაბად ქცევა უმნიშვნელოვანესია, განსაკუთრებით კი ახლა, როცა რუსეთ-უკრაინის ომის მიმდინარეობის ფონზე, საერთაშორისო გადამზიდავები სატვირთო მარშრუტების დივერსიფიცირებას აქტიურად ცდილობენ, „შუა დერეფანზე“ კი მოთხოვნა იზრდება. „საერთაშორისო გადამზიდავები სულ უფრო აქტიურად ცდილობენ თავიანთი სატრანსპორტო მარშრუტების დივერსიფიკაციას, რის გამოც „შუა დერეფნის“ გავლით ტრანსპორტის გადაზიდვაზე მოთხოვნა მნიშვნელოვნად იზრდება. ტრანსკასპიური დერეფნის გახსნამ, შესაძლოა, კავკასიისა და ცენტრალური აზიისთვის ახალი სავაჭრო შესაძლებლობები შექმნას. დერეფნის განვითარება გაზრდის რეგიონში წარმოდგენილი ქვეყნების ეკონომიკურ პოტენციას და ხელს შეუწყობს ლოგისტიკური და სატრანსპორტო ჰაბების განვითარებას“, - განაცხადა რენო-ბასომ. EBRD-ის პრეზიდენტმა აღნიშნა, რომ ბანკი დაინტერესებულია საქართველოს სატრანსპორტო პოტენციალით და ამ მიმართულებით არაერთი ქმედითი ნაბიჯით იდგმება, მაგალითად: EBRD მხარს უჭერს საზღვაო ტრანსპორტის სააგენტოს ნავსადგურების საკომუნიკაციო სისტემის იმპლემენტაციაში; ხელს უწყობს საქართველოს რკინიგზის დიგიტალიზაციის პროცესს და აგრეთვე გამოხატავს მზაობას, დამატებითი ინვესტიციები გამოყოს ქვეყნის მდგრადი ინფრასტრუქტურის განვითარებაში. აღსანიშნავია, რომ EBRD-ს საქართველოში 270 პროექტში 5 მილიარდი ევროს ინვესტიცია აქვს განხორციელებული, პრიორიტეტულ სფეროებს კი მდგრადი ინფრასტრუქტურა, საფინანსო სექტორი და წარმოების სექტორი წარმოადგენს. შეგახსენებთ, რომ პრეზიდენტი ოდილ რენო-ბასო 12-16 სექტემბერს კავკასიის ტურნეს გამართავს, რომლის ფარგლებშიც ის საქმიანი ვიზიტით საქართველოს, აზერბაიჯანსა და სომხეთს ეწვევა.

ავტორი: გიორგი თოლორდავა