ოლექსი არესტოვიჩის განცხადებას მმართველ გუნდში აფასებენ და მის სიტყვებს შემაშფოთებელს და კატასტროფულს უწოდებენ.

"ქართული ოცნების" დეპუტატების შეფასებით, არესტოვიჩის სიტყვები პირდაპირი მუქარაა. როგორც პარლამენტის თავდაცვისა და უშიშროების კომიტეტის თავმჯდომარე ირაკლი ბერაია აცხადებს, არესტოვიჩის განცხადება პირდაპირი მუქარაა საქართველოს მისამართით.

„არესტოვიჩი არ საუბრობს მარტო საქართველოზე, საუბრობს ჩვენს მეგობარ და პარტნიორ ქვეყნებზე, რაც ნიშნავს, რომ ეს ადამიანი საერთოდ გასული არის საღი აზროვნების ჩარჩოებიდან და საქმე გვაქვს სრულ ისტერიასთან და შიზოფრენიასთან. მე ასე შემიძლია ეს დავახასიათო, სხვა ახსნას და დეფინიციას ამას ვერ მოვუძებნი“, - ირაკლი ბერაიამ.

უკრაინის პრეზიდენტის ოფისის მრჩეველის განცხადებას პასუხობს პარლამენტის საპროცედურო საკითხთა და წესების კომიტეტის თავმჯდომარე ირაკლი ქადაგიშვილიც.

"მისი ლოგიკა ასეთი არის - ჯერ შედის ჯარი, ჯარს მოჰყვება დიპლომატები და მათ მერე მოჰყვებიან ინვესტორები, ანუ ჩვენ ახალ იმპერიალისტებს ვიღებთ. როგორც ადრე იყო, ჯერ შემოდიოდა რუსული ჩექმა, მერე მოჰყვებოდა რუსული დიპლომატია და მერე მოჰყვებოდა რუსული აღმშენებლობა. ახლა არესტოვიჩია, მთელ უკრაინაზე არ ვლაპარაკობ, არესტოვიჩეულ უკრაინაზე ვლაპარაკობ, მათი გეგმა ეს არის, ამიტომ ქართველებო, კარგად ვიცოდეთ: "სლავა უკრაინა" მებრძოლებისთვის რა არის და არესტოვიჩისთვის რა არის“, - განაცხადა ქადაგიშვილმა.

ცნობისთვის, უკრაინის პრეზიდენტის ოფისის მრჩეველმა ოლექსი არესტოვიჩმა ერთ-ერთ იუთუბ არხზე გამართულ დისკუსიაში განაცხადამ რომ უკრაინას მალე ქართველების „დახსნა“ მოუწევს. მისი თქმით, უახლოეს მომავალში, რაც უკრაინა რუსეთთან ომში უპირატესობას მოიპოვებს, ისინი უნდა გადაერთონ საქართველოს "შველაზე".