საფრანგეთი რუსებისთვის ვიზების საფასურსა და მოთხოვნების დამუშავების დროს გაზრდის
12 სექტემბერი, 2022
საფრანგეთი განაგრძობს რუსებისთვის მოკლევადიანი ვიზების გაცემას, მაგრამ გაზრდის ვიზის საფასურსა და მოთხოვნების დამუშავების დროს. ამის შესახებ ნათქვამია მოსკოვში საფრანგეთის საელჩოს ვებგვერდზე გამოქვეყნებულ ინფორმაციაში.
ინფორმაციაში განმარტებულია, რომ პარიზი ევროკავშირის საბჭოს მითითებების შესაბამისად მოქმედებს.
ახალი წესების მიხედვით, ვიზის საფასური გაორმაგდება - 35-დან 80 ევრომდე. გარდა ამისა, შენგენის მოთხოვნის განხილვას ახლა შეიძლება 45 დღე დასჭირდეს.
ვიზის აღების მსურველებს საელჩო ურჩევს, მოგზაურობის დაგეგმვისას, გაითვალისწინონ აღნიშნული პერიოდი.
ამავე ინფორმაციის მიხედვით, ცვლილებები არ შეეხება გრძელვადიან ვიზებს.
ცნობისთვის, აგვისტოს ბოლოს, ევროკავშირის საგარეო საქმეთა მინისტრები პრაღაში გამართულ არაფორმალურ შეხვედრაზე შეთანხმდნენ, რომ შეაჩერონ რუსეთთან სავიზო რეჟიმის გამარტივების შეთანხმება.
