საპროცედურო საკითხთა კომიტეტის სხდომაში, რომელიც 12-პუნქტიანი რეკომენდაციების შესრულების საკითხზე „ქართული ოცნების“ გეგმის ფარგლებში შეიკრიბა, ოპოზიცია არ მონაწილეობს
7 ივლისი, 2022
პარლამენტის საპროცედურო საკითხთა და წესების კომიტეტის სხდომაში, რომელიც ევროკავშირის 12-პუნქტიანი რეკომენდაციების შესრულებაზე მმართველი პარტიის გეგმის ფარგლებში შეიკრიბა, საპარლამენტო ოპოზიცია არ მონაწილეობს.
კომიტეტის სხდომას მხოლოდ "ქართული ოცნების" დეპუტატები ესწრებიან. პარტია „ქართული ოცნება“ ევროკავშირის მიერ განსაზღვრული 12 პირობის შესასრულებლად პარლამენტის კომიტეტების ფარგლებში რამდენიმე სამუშაო ჯგუფის შექმნას გეგმავს.
სამუშაო ჯგუფი შეიქმნება მათ შორის დეოლიგარქიზაციის შესახებ კანონზე მუშაობის მიზნით. ასევე, დაკომპლექტდება მონიტორინგის ჯგუფი დეპოლარიზაციის ხელშესაწყობად.
მმართველი პარტიის თავმჯდომარემ, ირაკლი კობახიძემ ევროკავშირის მიერ დადგენილი 12 პუნქტის შესრულების კონკრეტული გეგმა 1-ელ ივლისს წარადგინა. ამ გეგმის თანახმად, პარლამენტის საპროცედურო საკითხთა და წესების კომიტეტთან ყველა საპარლამენტო პარტიისა და სამოქალაქო სექტორის წარმომადგენლების მონაწილეობით სამუშაო ჯგუფი შეიქმნება, რომელიც საპარლამენტო ზედამხედველობის სფეროში პარლამენტის რეგლამენტის აღსრულების ყოვლისმომცველ შეფასებას უზრუნველყოფს და მოამზადებს საკანონმდებლო ინიციატივას გამოვლენილი ხარვეზების გამოსასწორებლად. ინფორმაციისთვის, საპარლამენტო ოპოზიციიდან კომიტეტის წევრები არიან: ლევან ბეჟაშვილი, თამარ კორძაია, პაატა მანჯგალაძე და ბაჩუკი ქარდავა. ამასთან, სურვილის შემთხვევაში, კომიტეტის სხდომაზე დასწრების უფლება და შესაძლებლობა ნებისმიერ არაწევრ დეპუტატს აქვს.
