აშშ-ის სახელმწიფო მდივანი ენტონი ბლინკენი სომხეთის პრემიერ-მინისტრს, ნიკოლ ფაშინიანს ტელეფონით ესაუბრა. ამის შესახებ ინფორმაციას სახელმწიფო დეპარტამენტი ავრცელებს.

როგორც განცხადებაშია ნათქვამი, "აშშ-ის სახელმწიფო მდივანი, ენტონი ბლინკენი სომხეთის პრემიერ-მინისტრ, ნიკოლ ფაშინიანს მთიან ყარაბაღში აზერბაიჯანის სამხედრო მოქმედებების შესახებ ესაუბრა".

"სახელმწიფო მდივანმა დაადასტურა აშშ-ის მხარდაჭერა სომხეთის სუვერენიტეტის, დამოუკიდებლობისა და ტერიტორიული მთლიანობის მიმართ. ენტონი ბლინკენმა გამოხატა შეერთებული შტატების ღრმა შეშფოთება მთიან ყარაბაღში ეთნიკურად სომეხი მოსახლეობის მდგომარეობის გამო. მან ხაზგასმით აღნიშნა, რომ შეერთებული შტატები მოუწოდებს აზერბაიჯანს, დაიცვას მშვიდობიანი მოსახლეობა და პატივი სცეს მთიანი ყარაბაღის მაცხოვრებლების უფლებებსა და ძირითად თავისუფლებებს, ასევე უზრუნველყოს თავისი შეიარაღებული ძალების მიერ საერთაშორისო ჰუმანიტარული სამართლის ნორმების დაცვა“, – აღნიშნულია სახელმწიფო დეპარტამენტის ინფორმაციაში.