შეერთებული შტატები პირდაპირი ფორმით არ მიიღებს მონაწილეობას უკრაინის კონფლიქტში, - განაცხადა სახელმწიფო დეპარტამენტის პრესსამსახურის უფროსის მოადგილემ, ვედანტ პატელმა.

"პრეზიდენტმა ჯო ბაიდენმა და სახელმწიფო მდივანმა ენტონი ბლინკენმა ნათლად განაცხადეს, რომ თუ აშშ-ზე ან ჩვენს მოკავშირეებზე არ განხორციელდება პირდაპირი თავდასხმა, ჩვენ პირდაპირი ფორმით არ ჩავერთვებით ამ კონფლიქტში, არც ამერიკელი ჯარისკაცების გაგზავნით და არც რუსეთის სამხედრო ძალებზე შეტევით", - განაცხადა პატელმა გამართულ ბრიფინგზე.

მანამდე, ვოლოდიმირ ზელენსკიმ, ავსტრალიის უნივერსიტეტში ვიდეომიმართვისას განაცხადა, რომ ნატო-მ უნდა განახორციელოს „პრევენციული“ დარტყმები რუსეთის ფედერაციაზე და არ „დაელოდოს რუსეთის ბირთვულ დარტყმებს“. მოგვიანებით, უკრაინის პრეზიდენტის პრესმდივანმა, სერგეი ნიკიფოროვმა განმარტა, რომ ზელენსკის არ გაუკეთებია მოწოდება რუსეთის ფედერაციის წინააღმდეგ ბირთვული იარაღის გამოყენებაზე, და რომ მან მხოლოდ პრევენციული სანქციები იგულისხმა.