21 აგვისტო, 2022

სექტემბერი ახლოვდება და სტარტს იღებს ახალი სასწავლო წელიც. ბაღები და სკოლები აღსაზრდელების მისაღებად ემზადებიან. როგორც „ბიზნესპრესნიუსთან“ საუბრისას კერძო ბაღების ასოციაცია „მნათი”-ს აღმასრულებელმა დირექტორმა, გიგი სისვაძემ განაცხადა, ყველა ბაღი აღსაზრდელების მისაღებად უკვე მზადაა.

„კერძო ბაღები სრულყოფილად მზად არის ბენეფიციარების მისაღებად. ფუნქციონირება და მუშაობა ჩვეულ რეჟიმშია აღდგენილი. მართვის ახალი სტანდარტი დავნერგეთ და ძალიან ახალი და კარგი შედეგები გვაქვს ამ კუთხით - ბავშვის კვებას, რაციონს და სურსათის უვნებლობის სერთიფიკატების საკითხებში. სერთიფიკატის მოპოვება საკმაოდ რთული პროცესი იყო: ჩავატარეთ ტრენინგები, სპეციალისტები გადავამზადეთ, შენობა-ნაგებობების კონსტრუქციები რიგ შემთხვევებში შევცვალეთ, კონფიგურაციების გადაჯგუფება მოვახდინეთ და შესაბამისად, ამ კუთხით კერძო ბაღები სრულად არის მობილიზებული“, - განაცხადა ასოციაციის დირექტორმა.

მისი თქმით, თბილისის მასშტაბით დაახლოებით 100 კერძო ბაღია. როგორც „მნათის“ ხელმძღვანელმა განაცხადა, პანდემიის პერიოდში ბევრ ბაღს გაუჭირდა და იმ პერიოდში მათი რაოდენობა დაახლოებით 50-ს შეადგენდა, ამჟამად კი ეს რაოდენობა გაორმაგებულია.

რაც შეეხება ქვეყნის მასშტაბით, კერძო ბაღების საერთო რაოდენობა დაახლოებით, 250-ს აღწევს. „აქედან არის 10-ბავშვიანი ჯგუფებიც, ანუ პანდემიის დროს სახლებში გაკეთებულ ბაღებზე ვამბობ, თუმცა მე სათვალავში ვგულისხმობ დიდ ბაღებს, რომლებიც ადმინისტრირებულად და ორგანიზებულად უდგებიან საკითხს და სახელმწიფოს მიერ დაწესებულ ყველა რეგულაციას ექვემდებარებიან“.

როგორც გიგი სისვაძემ განაცხადა, კერძო ბაღებში გადასახადებმა დაახლოებით 30-40%-ით მოიმატა, სეგმენტისა და სერვისის გათვალისწინებით.

„სახელმწიფო ორჯერ დაგვპირდა სუბსიდირებას, პანდემიის პროცესში მინისტრსაც შევხვდით, გვქონდა დაპირებები, თუმცა პაკეტმა, რომელიც შევიმუშავეთ, ფაქტობრივად, სექტორამდე ვერ მოაღწია, რადგან ისეთი რიცხვები ჩასვეს და ისეთი მბოჭავი პირობები ჩადეს, რომელიც შესაძლებლობას არ იძლეოდა, რომ ეს დახმარებები გამოყენებულიყო. შეიძლება ითქვას, რომ სახელმწიფოსგან დახმარება მხოლოდ 4-5-მა ბაღმა მიიღო, სხვამ - ვერ“, - განუცხადა „მნათის“ დირექტორმა „ბიზნესპრესნიუსს“.

მისი თქმით, ბაღებში კადრების პრობლემაც აქტუალურია და ასოციაცია ამ საკითხზე აქტიურად აპირებს მუშაობას. „სპეციალისტები ბაზარზე ძალიან ჭირს. ვაკეთებთ ერთიან ბაზას, სადაც პედაგოგები სკოლამდელი აღზრდის დაწესებულებებისთვის იქნებიან შერჩეულები, მომზადებულები და სერთიფიცირებულები.

სამომავლოდ, ასოციაციის ფარგლებში, საგურამოში ადმინისტრირებას ვუკეთებთ სპეციალურ შენობას. იქ ჩატარდება ტრენინგები, გადამზადდებიან პედაგოგები, ერთიანი ლოჯისტიკური ჰაბი გაკეთდება კერძო ბაღებისთვის, სადაც სერვისების მიწოდება მოხდება ელექტრონული შესყიდვების საფუძველზე"- აღნიშნა გიგი სისვაძემ.