რუსეთის პარტნიორები ევრაზიის ეკონომიკურ კავშირსა და კოლექტიური უსაფრთხოების ხელშეკრულების ორგანიზაციაში უზარმაზარი წნეხის ქვეშ არიან არამეგობრული სახელმწიფოების მხრიდან. ამის შესახებ რუსეთის საგარეო საქმეთა მინისტრმა სერგეი ლავროვმა ჟურნალ International Affairs-თან ინტერვიუში განაცხადა.

"ჩვენი პარტნიორები ევრაზიის ეკონომიკურ კავშირსა და კოლექტიური უსაფრთხოების ხელშეკრულების ორგანიზაციაში არამეგობრული სახელმწიფოების მხრიდან სერიოზულ ზეწოლას განიცდიან. დასავლეთის ქვეყნების დედაქალაქებიდან მაღალი თანამდებობის პირების ვიზიტები მათთან "კონსულტაციებისათვის" რეგულარულ მოვლენად იქცა. საუბარი ძირითადად რუსეთისთვის დაწესებული სანქციების "გვერდის ავლას" შეეხება. ყველაფერს რომ თავისი სახელი დავარქვათ, ისინი ცდილობენ მუქარისა და შანტაჟის გზით აიძულონ ჩვენი მოკავშირეები უარი თქვან რუსეთის ფედერაციასთან თანამშრომლობაზე", – აღნიშნა ლავროვმა.

"ჩვენ გაგებით ვეკიდებით იმ ფაქტს, რომ ამხელა გარე ზეწოლის შედეგად, ჩვენი პარტნიორები იძულებულები არიან წინდახედულობა გამოიჩინონ. ჩვენს შორის არსებული ორმხრივი სავაჭრო-ეკონომიკური ვალდებულებები კვლავ სრულდება, ვინაიდან ორივე მხარის ინტერესს შეესაბამება და არ არღვევს საერთაშორისო სამართლის ნორმებს", - დასძინა საგარეო საქმეთა მინისტრმა.

"ბუნებრივია, ჩვენი მხრიდან იდგმება შემხვედრი ნაბიჯები, რომლებიც მიმართულია გარე დესტრუქციული ზემოქმედების მცდელობების შესაჩერებლად. ამრიგად, ევრაზიის ეკონომიკური კავშირის ფარგლებში შემუშავდა საერთო ზომები რუსეთის და ბელარუსის წინააღმდეგ შემოღებული სანქციების შედეგების დასაძლევად. ამან უკვე მოგვცა კონკრეტული შედეგი. სტაბილურად იზრდება ორმხრივი ვაჭრობის მოცულობა, ორმხრივ ანგარიშსწორებაში ეროვნული ვალუტების წილი, ხოლო, სასურსათო და ენერგეტიკული უსაფრთხოება სრულად არის უზრუნველყოფილი", - განაცხადა სერგეი ლავროვმა.