კახეთში სტიქიამ ახმეტის მუნიციპალიტეტის რამდენიმე სოფელი აზარალა. მაღრაანში, ფიჩხოვანსა და არგოხში ძლიერმა ქარმა და სეტყვამ სასოფლო სამეურნეო ფართობები, ვენახები და საკარმიდამო ნაკვეთები დააზიანა. ქარმა წააქცია ელექტროგადამცემი ბოძები და მოგლიჯა ხეები.

როგორც ახმეტის მუნიციპალიტეტის მერმა, ალექსი ფიცხელაურმა განაცხადა, სტიქიით მიყენებულ ზარალს შესაბამისი კომისია ხვალიდან შეისწავლის.

ახმეტის შემდეგ კახეთში სტიქიამ თელავისა და გურჯაანის სოფლებიც დააზარალა. სეტყვამ და ძლიერმა ქარმა თელავის მუნიციპალიტეტში ლალისყურსა და ფშაველს, ხოლო გურჯაანში - ვაჩნაძიანს, კალაურს, კახიფარს, ვაზისუბანს, შაშიანს და ველისციხეს გადაუარა. სეტყვისა და ძლიერი ქარის შედეგად ვენახები, სასოფლო-სამეურნეო ფართობები და საკარმიდამო ნაკვეთებია განადგურებული.

სეტყვამ სახლის სახურავები და მანქანები, ძლიერმა ქარმა კი ხეხილი და ერთწლოვანი კულტურები დააზიანა, ფესვიანად მოგლიჯა ხეები და ელექტროგადამცემი ბოძები.

მოსახლეობა ამბობს, რომ ისინი მოსავლის გარეშე დარჩნენ და ბანკში საკრედიტო ვალდებულებების გადახდა გაუჭირდებათ.

კახეთის გუბერნატორის ხელმძღვანელობით, ხვალ დილიდან სპეციალური კომისია შეუდგება მუშაობას, რომელიც დაზიანებულ სახლებსა და ვენახებს აღწერს.

,,დილიდან სტიქიით დაზარალებულ მუნიციპალიტეტებში ზიანის აღრიცხვა დაიწყება, რათა დაზიანებული სახურავების შეკეთება დროულად მოვახდინოთ. ასევე, კომუნიკაციაში ვართ ,,რთველი- 2023“ შტაბთან, რათა დაზიანებული ყურძნის მოსავლის ჩაბარება ღვინის ქარხნებში დროულად მოხდეს“, – განაცხადა კახეთის გუბერნატორმა, გიორგი ალადაშვილმა.