შალვა პაპუაშვილი - დადასტურდა, რომ არანაირი სანქცია არ არსებობს კონკრეტული მოსამართლის წინააღმდეგ და აშშ-ის ელჩს ჰქონდა შეხვედრა ივანიშვილთან ომის შემდეგ, უკვე დასკვნები ჩვენ უნდა გამოვიტანოთ
3 აგვისტო, 2022
ორი ფაქტი დადასტურდა, რომ არანაირი სანქცია არ არსებობს კონკრეტული მოსამართლის წინააღმდეგ და აშშ-ის ელჩს ჰქონდა შეხვედრა ივანიშვილთან ომის შემდეგ , – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.
მისივე თქმით, ახლა დასკვნები ხალხმა უნდა გამოიტანოს, თუ არანაირი სანქცია არ არსებობს, მაშინ რას უკავშირდება მოსამართლის მოხსნა პროგრამიდან და რა მიზანი ჰქონდა ივანიშვილთან ელჩის შეხვედრას.
„მგონი, საკმარისად მოვისმინეთ სხვადასხვა სახის განმარტება, კითხვები, პასუხები თუ ასე შემდეგ. მგონი, შეგვიძლია, ამ პასუხებიდან ორი რამ დავასკვნათ. ერთი, რომ არანაირი სანქცია არ არსებობს კონკრეტული მოსამართლის წინააღმდეგ, დადასტურდა, მეორე, აშშ-ის ელჩს ჰქონდა შეხვედრა ბიძინა ივანიშვილთან ომის შემდეგ. ეს ორი ფაქტი დადასტურდა.
აქედან უკვე დასკვნები ჩვენ უნდა გამოვიტანოთ. კერძოდ, პირველ შემთხვევას რაც შეეხება, მოსამართლეს, თუკი არანაირი სანქცია არ არსებობს, მაშინ რა იყო ეს დაბარება და მოსამართლის მოხსნა პროგრამიდან, რომელშიც ის იყო. იყო ეს საელჩოს რომელიმე თანამშრომლის თვითნებობა თუ – არა. და მეორე, როდესაც ხდება საქართველოს ხელისუფლების ზურგს უკან ბიძინა ივანიშვილთან შეხვედრა, რა მიზანი ჰქონდა ამ შეხვედრას“, – განაცხადა შალვა პაპუაშვილმა.
