ევროპული საბჭოს პრეზიდენტი შარლ მიშელი ირანის პრეზიდენტისა და საგარეო საქმეთა მინისტრის, ასევე ეკიპაჟის წევრების დაღუპვის გამო მწუხარებას გამოთქვამს.

„ევროკავშირი გულითადად სამძიმარს გამოთქვამს ვერტმფრენის კატასტროფაში პრეზიდენტ რაისისა და საგარეო საქმეთა მინისტრ აბდოლაჰიანის, ასევე დელეგაციის სხვა წევრებისა და ეკიპაჟის წევრების დაღუპვის გამო. ჩვენი ფიქრები ოჯახებისკენაა მიმართული“, – წერს შარლ მიშელი.

შეგახსენებთ, მედიამ გაავრცელა ინფორმაცია, რომ ირანის პრეზიდენტის ვერტმფრენი ჩამოვარდა. ვერტმფრენის მგზავრებს შორის, პრეზიდენტთან ერთად, ქვეყნის საგარეო საქმეთა მინისტრი ჰოსეინ ამირ-აბდოლაჰიანიც იყო. მედიის ცნობით, რაისი ირან-აზერბაიჯანის სასაზღვრო ზონიდან ბრუნდებოდა და ჩრდილო-დასავლეთით მდებარე ქალაქ თავრიზისკენ მიემართებოდა. ირანული მედია პრეზიდენტ იბრაჰიმ რაისისა და საგარეო საქმეთა მინისტრის, ჰოსეინ ამირ-აბდოლაჰიანის დაღუპვას ადასტურებს.

ასევე დადგინდა ირანის პრეზიდენტის ვერტმფრენის ბორტზე მყოფი კიდევ სამი პირის ვინაობა.