ქვეყნის დედაქალაქის გარდა, შობის დღესასწაული აჭარაშიც იზეიმეს - საშობაო წირვა ყველა ტაძარში შესრულდა. განსაკუთრებული ხალხმრავლობა იყო ბათუმის ღვთისმშობლის შობის სახელობის საკათედრო ტაძარში. სასულიერო პირებმა მრევლი დალოცეს და შობის დღესასწაული მიულოცეს. რაც შეეხება ალილოს, მსვლელობა 12:00 საათზე ბათუმის საკათედრო ტაძრიდან დაიწყო.

საშობაო ლიტურგია ზუგდიდის ივერიის ყოვლად წმინდა ღვთისმშობლის შობის სახელობის საკათედრო ტაძარშიც გაიმართა. სადღესასწაულო წირვა ტაძრის მღვდელმსახურმა მამა გიორგი ქავთარაძემ აღავლინა. საშობაო ლიტურგიას ადგილობრივი ხელისუფლებისა და ოპოზიციის წარმომადგენლები ესწრებოდნენ.

საშობაო ლიტურგია აღევლინა ქუთაისში, მაცხოვრის შობის ტაძარშიც. მიტროპოლიტმა იოანემ მრევლი დალოცა და შობის ბრწყინვალე დღესასწაული მიულოცა. სადღესასწაულო ლიტურგია ქუთაისში მოქმედ ყველა ტაძარში ჩატარდა.

შობის ბრწყინვალე დღესასწაული იზეიმეს ალავერდის მამათა მონასტერში. საზეიმო წირვა აბბა ალავერდელმა მიტროპოლიტმა სასულიერო პირებთან ერთად აღავლინა. მეუფე დავითმა ტაძარში შეკრებილ მრევლს ქრისტე შობის დღესასწაული მიულოცა და ამ დღის მნიშვნელობაზე ისაუბრა.

ქრისტეშობის დღესასწაული იზეიმეს ატენისა და გორის ეპარქიაშიც. ყველა მოქმედ ტაძარში საზეიმო ღვთისმსახურება ჩატარდა.