შოლცი არაბული ტურნეს ფარგლებში გაზისა და წყალბადის მიწოდებაზე კონტრაქტებს გააფორმებს
24 სექტემბერი, 2022
გერმანიის კანცლერ ოლაფ შოლცის არაბულ ქვეყნებში ტურნეს ფარგლებში, გერმანული საქმიანი წრეების წარმომადგენლები გაზისა და წყალბადის მიწოდებაზე კონტრაქტების გაფორმებას აპირებენ. ამის შესახებ სააგენტო Bloomberg-ი გერმანელ მაღალჩინოსანზე დაყრდნობით წერს.
მათივე ცნობით, გათხევადებული ბუნებრივი აირის გერმანიისთვის გრძელვადიანად მიწოდებასთან დაკავშირებით გერმანიამ საუდის არაბეთთან „კონსტრუქციული მოლაპარაკებები“ აწარმოა. ამასთან, უცნობია რა პირობებზე, მოცულობაზე და ფასზეა საუბარი.
გარდა საწვავის კონტრაქტებისა, შოლცი რუსული ნავთობისთვის ფასის ჭერის შემოღებაზეც აპირებს მოლაპარაკებების გამართვას. როგორც ცნობილია, ეს ინიციტივა ევროკავშირის შიდა წრეებში ჯერ კიდევ განიხილება, თუმცა, მასზე კონსესუსი ამ დრომდე არ არსებობს.
გერმანული პრესის ცნობით, ოლაფ შოლცი 24-25 სექტემბერს ვიზიტს გამართავს საუდის არაბეთში, გაერთიანებულ საემიროებსა და ყატარში. პირველად ის ერ-რიადს ეწვევა, სადაც მას მემკვიდრე პრინცი უმასპინძლებს. გერმანიის კანცლერს ქვეყნის „წარმომადგენლობითი ეკონომიკური დელეგაცია“ ახლავს თან.
