შოთა გლურჯიძე: საქართველო ახლა ისევ სახიფათო სიტუაციაში იმყოფება და ჩვენი ვალია, მაქსიმალურად შევეცადოთ ამ საფრთხეს თავი ავარიდოთ
5 აგვისტო, 2022
მხატვარი შოთა გლურჯიძე საქართველოში რუსეთის მოქალაქეების შემოსვლის თემას სოციალურ ქსელში ეხმაურება:
„უკიდეგანო გოიმობა და "ფაშიზმია" ის, რაც ამ მუდმივ ისტერიკაში გვამყოფებს.
რუსეთის ფედერაციამ ჩვენი ტერიტორიების ოკუპაცია 2008 წელს სარკოზის შუამავლობით გაფორმებული, ჩემი აზრით, კაპიტულაციის ტოლფასი ხელშეკრულებით დაასრულა. ამ ხელშეკრულების შემდეგ ჩვენს მოქალაქეებს რუსეთში თავისუფალი, უვიზო მიმოსვლა შეეზღუდათ; ჩვენმა [მაშინდელმა] ხელისუფლებამ კი, რუსეთის მოქალაქეებისათვის ცალმხრივი უვიზო რეჟიმი შემოიღო. ჩემი აზრით, ეს ჩვენი მოქალაქეების მიმართ დისკრიმინაციული გადაწყვეტილება იყო.
ამ მოცემულობაში ვართ უკვე 14 წელიწადია და ჩვენს „ფაშისტებს“ მხოლოდ ახლა, საეჭვოდ გაახსენდათ, რომ რუსეთის ფედერაციის მოქალაქეები ამ ცალმხრივი პრეფერენციებით სარგებლობენ.
ეს უგვანოდ დადგმული ისტერიკა საეჭვოდ ემთხვევა კავკასიაში ასევე საეჭვოდ განახლებულ დაძაბულობას მთიან ყარაბაღში და რა თქმა უნდა, ასევე რუსეთ-ნატოს ომს უკრაინის ტერიტორიაზე. სამწუხაროდ, ჩვენი კონტრდაზვერვის საშუალებები არ არის უკიდეგანო და ყველა ამ პროვოკაციას ვერ აღკვეთს.
ჩემი აზრით, საქართველო ახლა ისევ სახიფათო სიტუაციაში იმყოფება და ჩვენი ვალია, მაქსიმალურად შევეცადოთ ამ საფრთხეს თავი ავარიდოთ. თუ ჩვენ შევძელით და არ შევედით ისევ საბედისწერო პროვოკაციაში, ეს იქნება ჩვენი გამარჯვება.“ - წერს შოთა გლურჯიძე.
