24 სექტემბერი, 2022

პარასკევს, შვეიცარიელმა ჩოგბურთელმა როჯერ ფედერერმა თავის კარიერაში ბოლო მატჩი ჩაატარა. ფედერერმა მატჩი რაფაელ ნადალთან ერთად, ლონდონის O2 არენაზე, Laver Cup-ის საერთაშორისო ტურნირის ფარგლებში გამართა.

"არაჩვეულებრივი დღე იყო, თავს ბედნიერად ვგრძობ. მიხარია, აქ რომ ვარ და ეს ყველაფერი განვიცადე", - განაცხადა ფედერერმა.

შვეიცარიელმა ჩოგბურთელი ტიროდა, როდესაც ნადალს და სხვა მოთამაშეებს ემშვიდობებოდა, ხოლო ტრობუნებზე 17,500 გულშემატკივარი სკანდირებდა მის სახელს. ცრემლები ვერც ნადალმა შეიკავა.

15 სექტემბერს 41 წლის ჩოგბურთელმა თავისი 24 წლიანი საჩოგბურთო კარიერა დასრულებულად გამოაცხადა.

"ეს ერთდროულად მწარე და სასიამოვნო გადაწყვეტილებაა. ერთი მხრივ, ტურნირები მომენატრება, მაგრამ, ამავდროულად, სასიხარულოც ბევრი მაქვს. თავს დედამიწაზე ერთ-ერთ ყველაზე ბედნიერ ადამიანად მივიჩნევ, მე მივიღე განსაკუთრებული ნიჭი - მეთამაშა ჩოგბურთი და ეს გავაკეთე ისეთ დონეზე, რასაც ვერც კი წარმოვიდგენდი და იმდენად დიდხანს, რაც შესაძლებლად არც კი მიმაჩნდა", - განაცხადა ფედერერმა.

როჯერ ფედერერს ჩოგბურთის ისტორიად მიიჩნევენ, სპორტსმენად, რომელმაც მთელი ხანგრძლივი კარიერის მანძილზე უზადო რეპუტაცია შეინარჩუნა. ბოლო სამი წლის მანძილზე მას მრავალრიცხოვან ტრავმებთან უწევდა გამკლავება.