სლოვაკეთის პრემიერ-მინისტრი რობერტ ფიცო ცეცხლსასროლი იარაღიდან დაჭრეს. ის ამ დროისთვის ჰოსპიტალიზებულია.

შემთხვევა ბრატისლავადან 180 კილომეტრში, ქალაქ ჰანდლოვაში, სამთავრობო შეხვედრის შემდეგ მოხდა. ადგილობრივი მედიის ცნობით, აღნიშნულ ინფორმაციას სლოვაკეთის პარლამენტის თავმჯდომარის მოადგილე ადასტურებს.

ამასთან, „როიტერთან“ საუბრისას, ერთ-ერთმა თვითმხილველმა განაცხადა, რომ რამდენიმე გასროლის ხმა გაიგო და დაინახა, როგორ აკავებდა პოლიცია მამაკაცს.

მოგვიანებით, სლოვაკეთის საზოგადოებრივმა მაუწყებელმა რობერტ ფიცოზე თავდასხმის ვიდეოკადრები გაავრცელა. კადრებში ჩანს, როგორ გაჰყავთ შემთხვევის ადგილიდან დაჭრილი პრემიერ-მინისტრი.

სლოვაკური მედიის ინფორმაციით, პრემიერ-მინისტრ რობერტ ფიცოს 71 წლის მამაკაცი დაესხა თავს, რომელსაც იარაღი ლეგალურად ჰქონდა. მათივე ცნობით, თავდამსხმელი, მემარცხენე ჯ.ს. ბრანია ქალაქ ლევიცეში ცხოვრობს.

მედია თვითმხილველებზე დაყრდნობით წერს, რომ მამაკაცმა რობერტ ფიცოს ჯერ დაუძახა, შემდეგ კი მასთან ხელის ჩამოსართმევად მივიდა და ესროლა. პოლიციამ მამაკაცი შემთხვევის ადგილზევე დააკავა.

სლოვაკური მედია დაკავებულის შვილს დაუკავშირდა, რომელმაც დაადასტურა, რომ მამამისი იარაღს ლეგალურად ფლობდა. მისივე ცნობით, 71 წლის მამაკაცს ფსიქიკური პრობლემები არ ჰქონია. მედია წერს, რომ თავდამსხმელი კერძო დაცვის სამსახურში მუშაობდა.