5 აგვისტო, 2022

ცნობილი ქართველი სოპრანო, სალომე ჯიქია, აშშ პრემიერისთვის ემზადება.

სიეტლის ოპერაში, 6 აგვისტოს, გაეტანო დონიცეტის „სიყვარულის ნექტარი“ (L'elisir d'amore) დაიდგმება, სადაც ადინას როლს სწორედ სალომე ჯიქია შეასრულებს. ორკესტრს ჯამპაოლო ბისანტი უდირიჟორებს, დადგმის რეჟისორი კი - სტივენ ლოულესი გახლავთ. ფელიჩე რომანის უკვდავ ლიბრეტოს ქართველ სოპრანოსთან ერთად, ლუკა პისარონი, ამიტაი პატი და ანდრეს აკოსტა შეასრულებენ.

სალომე ჯიქია ბოლო დროის ერთ-ერთ ყველაზე წარმატებულ ქართველ სოპრანოდ მიიჩნევა. ვოკალის ხელოვნებას იგი ზაქარია ფალიაშვილის სახელობის სახელმწიფო სამუსიკო სკოლაში ეუფლებოდა, შემდეგ კი, სწავლა იტალიაში, ქალაქ რომში, სანტა ჩეჩილიას ეროვნული აკადემიის საოპერო სტუდიაში, ლეგენდარულ მომღერალ რენატა სკოტოსთან განაგრძო. მიღებული აქვს არაერთი საოპერო პრიზი და პრემია.

2017 წელს სალომე ჯიქიამ ლონდონის სამეფო ოპერის თეატრ „კოვენტ-გარდენის“ სცენაზე დადგმულ მოცარტის ოპერა „მითრიდატე პონტოელში“ იმღერა. მისი ვოკალი და საშემსრულებლო ოსტატობა მუსიკის ყველა მიმომხილველმა ერთხმად აღნიშნა. 2020 წლის სექტემბრის ბოლოს სალომემ ციურიხის „ოპერნჰაუზში“ დაგეგმილ პრემიერაში მიიღო მონაწილეობა, სადაც დედოფალ ელისაბედის პარტია შეასრულა გაეტანო დონიცეტის ოპერაში „მარია სტიუარდა“. იმავე დადგმაში მას პარტნიორობას მსოფლიოში აღიარებული გერმანელი სოპრანო, დიანა დამრაუ უწევდა მარია სტიუარტის (სტიუარდა) როლში. განსაკუთრებული რეზონანსი მოჰყვა სალომე ჯიქიას სასცენო შესრულებას ცნობილ ესპანელ ტენორ, ხოსე კარერასთან ერთად. მათი ერთობლივი გამოსვლა პირველად „ჩექ ინ ჯორჯიას“ ფარგლებში, საქართველოში, ქალაქ ქუთაისში შედგა, რის შემდეგაც ხოსე კარერასმა სალომე თავის გამოსამშვიდობებელ მსოფლიო ტურნეში მიიწვია. მათ ერთად იმღერეს დუბაიში, ბრიუსელსა და სეულში.

2022 წლის ზაფხულში, საფრანგეთში, პუჩინის ოპერაში „ტოსკა“ სალომე ჯიქიამ ფლორია ტოსკას როლი შეასრულა.