სპეცოპერაცია ქვეყნის მასშტაბით - დაკავებულია 10-ზე მეტი ნარკორეალიზატორი
შინაგან საქმეთა სამინისტროს თანამშრომლებმა ქვეყნის მასშტაბით ჩატარებული სპეცოპერაციების შედეგად 10-ზე მეტი ნარკორეალიზატორი დააკავეს. აღნიშნულზე კომენტარი გააკეთა შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორმა თეიმურაზ კუპატაძემ.
როგორც კუპატაძემ აღნიშნა, დაკავებულებს შორის არიან უცხო ქვეყნის მოქალაქეებიც, ჩხრეკის შედეგად კი ამოღებულია სხვადასხვა ტიპის ნარკოტიკული საშუალებები.
"თბილისში, ბათუმსა და სხვადასხვა ქალაქებში, დაკავებულია 10-ზე მეტი ნარკოდამნაშავე და რეალიზატორი. ჩხრეკის შედეგად ამოღებულია სხვადასხვა სახის ნარკოტიკული საშუალებები, დიდი რაოდენობით და ასევე, რეალიზაციის შედეგად მიღებული თანხა. ამ ადამიანებს ქვეყანაში ნარკოტიკები სხვადასხვა გზით შემოჰქონდათ. დაკავებულები არიან როგორც საქართველოს, ისე უკრაინის, ყაზახეთისა და რუსეთის მოქალაქეები. ისინი მოსამართლის განჩინების საფუძველზე არიან დაკავებულები. ასევე, არსებობს ფარული ვიდეოჩანაწერები და ყველა ის მტკიცებულება, რაც მათი დაკავების საფუძველი გახდა," - განაცხადა თეიმურაზ კუპატაძემ.
მისივე ინფორმაციით, ამოღებულია ისეთი ნარკოტიკები, როგორებიცაა ჰეროინი, კოკაინი და სხვა.
სპეცოპერაცია ტარდებოდა ფონიჭალაშიც, სადაც ორი პირი დააკავეს. სამართალდამცველებმა გოგებაშვილის ქუჩაზე მდებარე საცხოვრებელი სახლებიდან, ჩხრეკის შედეგად, განსაკუთრებით დიდი ოდენობით ნარკოტიკული საშუალება ამოიღეს.
