18 სექტემბერი, 2022

უკრაინის ინფრასტრუქტურის სამინისტროს ინფორმაციით, თურქეთისა და გაეროს შუამავლობით მიღწეული შეთანხმების ფარგლებში, უკრაინის პორტები ჯამში სასოფლო-სამეურნეო პროდუქტით დატვირთულმა 165-მა გემმა დატოვა. შესაბამისად, უკრაინის შავი ზღვის ბლოკირებული პორტებიდან ჯამში დაახლოებით 3.7 მლნ ტონა პროდუქტია ექსპორტირებული. სამინისტროს ინფორმაციით, მხოლოდ დღეს პორტებიდან 169 300 ტონა პროდუქტით დატვირთული 10 გემი გავა. რუსეთ-უკრაინის შეიარაღებული კონფლიქტის დაწყების შემდეგ უკრაინიდან მარცვლეულის ექსპორტი გაჩერდა. შედეგად მსოფლიოში სურსათზე ფასი გაიზარდა, ხოლო აფრიკის ქვეყნები სურსათის დეფიციტის საფრთხი წინაშე აღმოჩნდნენ, რადგან უკრაინა მსოფლიოში მარცვლეულის ერთ-ერთი მსხვილი ექსპორტიორია. როგორც Reuters წერს, ომამდე ქვეყნიდან ექსპორტზე თვეში 6 მლნ ტონამდე მარცვლეული გადიოდა. ივლისში რუსეთთან ხელმოწერილი შეთანხმების ფარგლებში შავი ზღვის სამი პორტი გაიხსნა. კერძოდ, 22 ივლისს, სტამბოლში, უკრაინამ და რუსეთმა შეთანხმებები გააფორმეს თურქეთთან და გაეროსთან უკრაინის სამი პორტის - ოდესის, ჩერნომორსკისა და იუჟნის გათავისუფლების შესახებ, რომლებიც მიმდინარე წლის თებერვლიდან ბლოკირებული იყო. უკრაინის ინფრასტრუქტურის სამინისტროს ინფორმაციით, აღნიშნულ პორტებს თვეში 100-150 სატვირთო გემის გატარება შეუძლიათ.