სტოკჰოლმის ნობელის პრემიის დაჯილდოების ცერემონიაზე რუსეთის, ბელორუსიისა და ირანის ელჩების მოწვევა გააუქმეს
ნობელის პრემიის დაჯილდოებაზე, რომელიც სტოკჰოლმში უნდა გაიმართოს, რუსეთის, ბელარუსისა და ირანის ელჩების მოწვევები გააუქმეს. ამის შესახებ ფონდის ვებგვერდზე გამოქვეყნებულ განცხადებაშია ნათქვამი.
ფონდის წარმომადგენლების განმარტებით, ელჩების მოწვევის გაუქმების შესახებ გადაწყვეტილება საზოგადოების მწვავე რეაქციის გამო მიიღეს.
„ჩვენ ვაცნობიერებთ შვედეთში საზოგადოების ძლიერ რეაქციას. ამიტომ, ნობელის ფონდის მმართველმა საბჭომ მიიღო გადაწყვეტილება, ნობელის პრემიის დაჯილდოების ცერემონიაზე, ისევე, როგორც შარშან, გამონაკლისის სახით არ მიიწვიონ რუსეთის, ბელარუსისა და ირანის ელჩები“, – ნათქვამია განცხადებაში.
ცნობისთვის, მანამდე ცნობილი გახდა, რომ ნობელის ფონდმა მიიღო გადაწყვეტილება, რომ სტოკჰოლმში დაგეგმილ ნობელის პრემიის დაჯილდოებაზე რუსეთისა და ბელარუსის ელჩები მიეწვიათ. ამ გადაწყვეტილებას შვედეთის პრემიერ-მინისტრისა და პოლიტიკური პარტიების ლიდერების მხრიდან მწვავე კრიტიკა მოჰყვა.
